Депутат соғлиқни сақлаш вазиридан хизмат текшируви натижаларини халқ вакилларига маълум қилишни сўради
Мамлакатимизда ислоҳотларнинг янги босқичида коррупциянинг олдини олиш ва унга қарши курашиш, давлат ва жамият қурилишининг барча соҳаларида коррупциоген омилларга чек қўйишга қаратилган кенг кўламли ишлар амалга оширилмоқда. Хусусан, “Коррупцияга қарши курашиш тўғрисида”ги Қонун қабул қилинди. Коррупцияга қарши курашиш агентлиги ташкил этилди.
Шунингдек, қисқа вақт ичида коррупцияга қарши курашишнинг ҳуқуқий механизмларини такомиллаштиришга оид бешта норматив-ҳуқуқий ҳужжат — “Ҳуқуқий ахборотни тарқатиш ва ундан фойдаланишни таъминлаш тўғрисида”ги, “Маъмурий тартиб-таомиллар тўғрисида”ги, “Жамоатчилик назорати тўғрисида”ги, “Давлат харидлари тўғрисида”ги қонунлар қабул қилинди.
Айни кунларда ижтимоий тармоқларда Республика ихтисослаштирилган онкология ва радиология илмий-амалий маркази Тошкент шаҳар филиалининг бир гуруҳ ходимлари муассасада юз бераётган коррупция ҳолатлари ва бошқа қонунбузарликлар юзасидан салбий ҳолатларга қонуний баҳо беришни сўраб қилган мурожаати кўплаб муҳокамаларга сабаб бўлмоқда.
2021 йил 22 февраль куни Олий Мажлис Қонунчилик палатасидаги парламент эшитувида Коррупцияга қарши курашиш ва суд-ҳуқуқ масалалари қўмитаси раиси Жаҳонгир Ширинов соғлиқни сақлаш вазиридан ушбу масала юзасидан ўтказиладиган хизмат текшируви натижаларини халқ вакилларига маълум қилишни сўради.
Ж. Ширинов мазкур масалага, албатта, Коррупцияга қарши курашиш ва суд-ҳуқуқ масалалари қўмитаси ўз муносабатини билдиришини маълум қилди.
