АҚШ ўз захираларидан яна 40 миллион баррел нефть сотади
АҚШ Энергетика вазирлиги стратегик нефть захирасидан (SPR) 40,1 миллион баррелгача кўпроқ нефть сотади. Бу ҳақда “Интерфакс” хабар тарқатмоқда.
Энергетика вазирлиги 21 июндан 30 июнгача 39 миллион баррелгача SPR нефтни, 1 июлдан 15 августгача 1,1 миллион баррел юқори олтингугуртли нефтни етказиб беришни режалаштирмоқда.
Ҳужжатлар 1 июнга қадар қабул қилинади. Ёқилғи жўнатиладиган корхоналар билан шартномалар агентлик томонидан 10 июндан кечиктирмай имзоланади.
Ушбу ҳажмлар АҚШ томонидан март ойида эълон қилинган юқори ёқилғи нархлари ва етказиб беришдаги узилишларга қарши курашиш учун SPRдан олти ой давомида кунига 1 миллион баррел нефть сотиш режасининг бир қисмидир. Май ойидан июлгача 90 миллион баррел, қолган 90 миллион баррел эса август ойидан октябргача чиқиши режалаштирилган.
