Xorazmdagi maktabda 200 dan ortiq o‘qituvchilar va ishchi xodimlar ishsiz qoladimi?
Xabaringiz bor, joriy yil 22 may kuni ijtimoiy tarmoqlarda Qo‘shko‘pir tumanidagi 8-sonli maktab va 4-sonli IDUMning 200 dan ortiq o‘qituvchilari va ishchi xodimlari tomonidan videomurojaat yo‘llandi. Ular o‘z murojaatlarida 2 ta maktab bir binoda joylashgani sababli Moliya vazirligi tomonidan birlashtirilishi rejalashtirilgani oqibatida ishsiz qolishlari mumkinligini bildirganlar.
Holat yuzasidan vioyat Maktabgacha va maktab ta’limi boshqarmasi quyidagilarni ma’lum qiladi.
O‘zbekiston Respublikasi Prezidentining 2022 yil 14 apreldagi «Prezident ta’lim muassasalari agentligi tizimidagi ixtisoslashtirilgan maktablar tarmog‘ini kengaytirish to‘g‘risida»gi PF-106-sonli Farmoniga asosan Xalq ta’limi vazirligi tizimidagi umumta’lim maktab va maktab-internatlari negizida, Agentlik tizimidagi ixtisoslashtirilgan maktab va maktab-internatlari tashkil qilinishi belgilangan.
Ushbu Farmonga ko‘ra, 2022/2023-o‘quv yilidan boshlab fanlar chuqur o‘qitiladigan maktablar hamda maktab-internatlar bosqichma-bosqich umumiy o‘rta ta’lim maktablari sifatida qayta tashkil etilishi, ular faoliyati ushbu maktablarda ixtisoslashtirilgan dasturlar asosida ta’lim olayotgan o‘quvchilar o‘qishini bitirguniga qadar davom ettirilishi, fanlar chuqur o‘qitiladigan maktablar hamda maktab-internatlarning rahbarlariga hamda ixtisoslashtirilgan fanlardan dars o‘tganligi uchun pedagog kadrlariga amalda belgilangan qo‘shimcha ustama haqlar ushbu maktablardagi ixtisoslashtirilgan sinflar faoliyati tugatilguniga qadar saqlab qolinishi belgilab qo‘yilgan.
Yuqoridagilarni inobatga olib, bir binoda ikkita yuridik shaxs sifatida faoliyat yuritilayotgan ta’lim muassasalari Qo‘shko‘pir tumanidagi 4-sonli ayrim fanlar chuqur o‘qitiladigan sinflari mavjud umumiy o‘rta ta’lim maktabi O‘zbekiston Respublikasi Prezidentining 2022 yil 14 apreldagi «Prezident ta’lim muassasalari agentligi tizimidagi ixtisoslashtirilgan maktablar tarmog‘ini kengaytirish to‘g‘risida»gi PF-106-sonli Farmoniga asosan faoliyat olib borayotganligini, shu binoda joylashgan 8-sonli maktab umumiy o‘rta ta’lim maktabi sifatida faoliyat olib borayotganligini inobatga olgan holda ushbu ta’lim muassasalarini bitta ta’lim muassasasi sifatida qayta tashkil qilish PF-106-sonli Farmoniga asosan mumkin emasligi ma’lum qilindi.
Bu yuzadan viloyat Maktabgacha va maktab ta’limi boshqarmasi tomonidan viloyat Iqtisodiyot va moliya boshqarmasiga 2024 yil 21 may kuni xat orqali bildirilgan.
