Xiva shahrida o‘tkazilgan «Qovun sayli» festivali g‘olib va sovrindorlari taqdirlandi
9-11 avgust kunlari bo‘lib o‘tgan «Qovun sayli» yakunlariga ko‘ra bosh sovrinlar g‘oliblari aniqlandi: Xorazm viloyatining Yangibozor tumani Gran-prini qo‘lga kiritdi va «Traker» avtomashinasi bilan taqdirlandi. Birinchi o‘rinni egallagan Urganch shahriga «Oniks», ikkinchi o‘rinni olgan Xiva tumaniga «Damas», uchinchi o‘rinni egallagan Urganch va Qo‘shko‘pir tumanlariga esa har biriga motosikl sovg‘a qilindi.
«Qovunni qayta ishlash va saqlash uchun», «Qadimiy Xorazm navlarini qayta tiklash va yangi innovasion texnologiyalarni joriy etgani uchun», «Qovunchilikda eng foydali va eksport qilinadigan qovun yetishtirganligi uchun», «Eng shirin ekologik qovun yetishtirgani uchun» nominasiyalari bo‘yicha ham g‘oliblar taqdirlandi.
Festivalda Xorazm viloyati, Qoraqalpog‘iston Respublikasi, viloyatlar va Toshkent shahrining 13 ta shahar va tumanlari hokimliklarining 60 ta pavilonlari namoyish etildi. Ishtirokchilar 125 ga yaqin turdagi poliz mahsulotlari, yetishtirilgan meva-sabzavotlar, hunarmandchilik mahsulotlarini namoyish etdi.
