Xitoy AQShdan yiliga kamida 10 million tonna ko‘mir sotib olish majburiyatini oldi,

Vashington esa Xitoy mahsulotlariga nisbatan bojlarni yumshatishga tayyor, deb yozmoqda Bloomberg.

Bloomberg xabariga ko‘ra, Tramp va Si savdo urushini bosqichma-bosqich to‘xtatishda davom etmoqda.

Tramp va Si o‘rtasidagi uchrashuvdan so‘ng, Pekin 2027 yilda kamida 10 million tonna va 2028 yilda ham shuncha miqdorda AQSh ko‘mirini sotib olish kafolatini berdi. Shu bilan birga, ikki davlat har ikki tomondan qiymati 30 milliard dollarni tashkil etuvchi tovarlarga nisbatan bojlarni pasaytirish ustida ishlashga kelishib oldilar.

Tramp uchun ko‘mir masalasi birinchi navbatda ichki siyosatga daxldor: Oq uy ushbu sanoatni jonlantirish va Amerika ishlab chiqaruvchilari uchun kafolatlangan eksportni ta’minlashga intilmoqda. Bunda Xitoy muhim rol o‘ynaydi; Pekin qo‘shimcha bojlar joriy etganidan so‘ng, 2025 yilda AQShdan ushbu mamlakatga ko‘mir yetkazib berish hajmi 92 foizga keskin kamayib ketgan edi.

Xitoy uchun esa manfaat boshqa jihatda. AQSh xomashyosini sotib olish evaziga Pekin o‘z mahsulotlari uchun savdo to‘siqlarining bosqichma-bosqich kamaytirilishiga hamda o‘zining eng yirik eksport bozori bilan yanada barqaror va bashorat qilinadigan munosabatlarga erishadi.

Biroq eng qiziq jihati shundaki, savdo urushi yakunlanmadi, balki yirik muzokara jarayoniga aylandi. AQShga elektronika, aviasiya va mudofaa sanoati — ya’ni Pekin global qayta ishlash jarayonining katta qismini nazorat qiladigan sohalar — uchun Xitoyning nodir yer metallari zarur. Xitoy esa, o‘z navbatida, AQSh bozoriga kirish imkoniyatini ko‘zlamoqda. Natijada, tomonlar o‘zaro qaramlikni bartaraf etish o‘rniga, undan o‘zaro yon berishlar evaziga foydalanishga kirishmoqdalar.

Boshqacha aytganda, AQSh va Xitoy o‘rtasida va’da qilingan iqtisodiy "ajralish" o‘rniga, boshqariladigan o‘zaro qaramlik shakli yuzaga kelmoqda: Amerika xomashyosi va bozorga kirish imkoniyati Xitoy tovarlari, muhim materiallar va keskinlikning pasaytirilishi evaziga almashilmoqda.