Xavfli residivistning Transport prokuraturasi va ichki ishlar organidagi “faoliyati”

Muqaddam ikki marotaba firibgarlik va pora berishga dalolat qilish jinoyatlarini sodir etgani uchun sudlangan, xavfli residivist degan nomni ham olishga ulgurgan 35 yoshli erkak yana ayni shu jinoyatni sodir qilib, takroran boshi berk ko‘chadan yurishni lozim topdi...

“O‘rgangan ko‘ngil o‘rtansa qo‘ymas” deganlaridek, sudlanuvchi aldash va ishonchni suiiste’mol qilish yo‘li bilan o‘zganing mulkini qo‘lga kiritishni maqsad qiladi. Bir fuqaroga go‘yoki Sirg‘ali tuman hokimiyatida ishlovchi tanishi orqali mazkur tumanda joylashgan ko‘p qavatli uyning 4-qavatidan uch xonali, keyinchalik 1-qavatidan ikki xonali uy olib berishni va’da qiladi. Yolg‘on va’dalariga ishontirish uchun o‘zini Transport prokuraturasi xodimi deb tanishtiradi. Ishonchga kirgan ustamon ushbu uylarning boshlang‘ich to‘lovi sifatida 6300 AQSh dollarini qo‘lga kiritadi. Shundan 6000 AQSh dollarini uyning boshlang‘ich to‘lovi uchun, qolgan 300 AQSh dollarini esa mansabdor shaxsga pora berishiga dalolat qilgan. Tabiiyki va’dasini bajarmay pullarni o‘z ehtiyojlari uchun sarflagan.

Sudlanuvchi tuzog‘iga tushgan bu fuqaroni aldashda davom etadi. Go‘yoki, Transport prokuraturasida ishlovchi tanishlari orqali musodara qilingan avtomashinalarni auksion orqali yutib berishini va’da qiladi. “Transport prokuraturasi xodimiman”, deb turgani bois fuqaro dastlab “Isuzu”, so‘ngra “Lasetti” rusumli avtomashinalari uchun jami 3200 AQSh dollari bergan. Shundan 3000 AQSh dollarini auksion to‘lovi, qolgan 200 AQSh dollarini mansabdor shaxsga pora berishga dalolat qilgan.

Nafsi tinch qo‘ymagan sudlanuvchi jinoiy harakatlarini davom ettiradi. Sudlanuvchi bu gal “ish joyini o‘zgartirib”, ikkinchi jabrlanuvchiga o‘zini Ichki ishlar organlari xodimi deb tanishtiradi. “Tanishlarim orqali Patrul-post xizmatiga ishga kiritib qo‘yaman, evaziga 1500 AQSh dollar berishingiz kerak”, deya yolg‘on va’dalarga “ko‘madi”. Ishonchga kirgach, fuqarodan 3 500 000 so‘mni olib, “qolgan pullarni ishlash uchun buyruq chiqqandan so‘ng berasiz”, deya pora berishga dalolat qilgan holda aldab ketadi.

— Jabrlanuvchi o‘g‘lim, o‘qishga kirish maqsadida Rossiyaga ketgan. O‘g‘lim oshxonada ishlab kelgan vaqtida sudlanuvchi bilan tanishib qolgan va ishga kiritib qo‘yishni va’da qilgan. Bu orada o‘g‘lim muddatli harbiy xizmatni o‘tab keldi. Uyimizga kelgan sudlanuvchi o‘zini Ichki ishlar xodimi deb tanishtirdi va o‘g‘limni o‘zining tanishlari orqali Patrul-post xizmatiga ishga kiritib qo‘yishini aytdi. Evaziga 1500 AQSh dollar berishimiz kerakligini bildirgach, “avval ishga kirsin, keyin pul beraman”, dedim. Sudlanuvchi o‘g‘limga “fuqarolik pasporti va harbiy guvohnomangni olib kel”, degani uchun kelishilgan manzilda uchrashgan. O‘g‘lim unga oldindan 3 500 000 so‘m berishi, qolganini ishga kirganidan so‘ng berishini aytdi, taklifiga rozi bo‘ldim. Pulni sudlanuvchiga berganida “bu pullarga tibbiy ko‘riklar va jismoniy imtihonni hal qilib beraman”, degan. Keyin qo‘ng‘iroq qilsak, turli xil bahonalar qilib, aldab keldi, - deydi suddan pullarini undirib berishni so‘ragan guvoh.

Galdagi o‘lja esa ayol kishi bo‘ladi. Unga ham xuddi yuqoridagi holat kabi Sirg‘ali tuman hokimiyatida ishlovchi tanishi orqali qurilayotgan yangi uylardan ikki xonali uy olib berishni va’da qiladi. Sudlanuvchi o‘zini Ichki ishlar organlari xodimi deb tanishtiradi. Uyning boshlang‘ich to‘lovi uchun esa 2700 AQSh dollar berishi kerakligini aytib, jami 2900 AQSh dollarini qurtdek sanab oladi. “2000 AQSh dollari uyning boshlang‘ich to‘lovi uchun, qolgan 200 AQSh dollari mansabdor shaxsga beriladigan “pora”, deya aldaydi.

Uy “olib berish”ga ustasi farang bo‘lgan sudlanuvchi go‘yoki yana o‘sha tuman hokimiyatida ishlovchi tanishi orqali subsidiya asosida yangi qurilayotgan uylardan dastlab uch xonali, so‘ng to‘rt xonali uy olib berish bilan to‘rtinchi “o‘ljasi”ni ham yolg‘onlariga ishontirib, 8500 AQSh dollarini olgan. “8300 AQSh dollari uyni boshlang‘ich to‘lovi uchun, qolgan 200 AQSh dollari esa mansabdor shaxsga pora”, deya cho‘ntagini qappaytirgan.

Sudlanuvchining qolgan uch nafar “o‘ljasi” ayollar bo‘lgan. Ulardan biriga ham yangi qurilayotgan uylardan uch xonali uy olib berishni va’da qilgan va jami 2500 AQSh dollarini qo‘lga kiritgan. Ikkinchisiga esa to‘rt xonali uy olib berish bilan ishonchiga kirib, 4900 AQSh dollarini “uxlatgan”. So‘nggi xaridori bo‘lgan ayolga ham “uch xonali uy olib beraman”, deya aldab 700 AQSh dollarini cho‘ntakka “urgan”.

Biroq sudlanuvchi sudda ayblovlarga qisman iqrorlik bildirdi. — Sirg‘ali tumanida yashaganim bois tuman hokimiyatida uy-joy masalasi bo‘yicha tuman hokimi o‘rinbosari kimligidan xabarim bor edi. Shu sababli “uy olib beraman”, deb aldaganimda barcha fuqarolarga o‘sha mas’ulning ismini tilga olganman. Maqsadim uy olib berish emas, balki fuqarolardan aldab pullarini qo‘lga kiritish bo‘lgan. Pullarni ehtiyojlarimga ishlatganman. Biror bir fuqaroni pora berishga dalolat qilmaganim uchun ayblovlarga iqror emasman, firibgarlik aybloviga esa to‘liq iqrorman, - dedi yengillik so‘ragan sudlanuvchi.

Sudlanuvchi Jinoyat kodeksining 168-moddasi (firibgarlik) 3-qismining “a, b” bandlari va 28,211-moddasi (pora berishga dalolat qilish) 2-qismining “a” bandida nazarda tutilgan jinoyatlarni sodir qilganlikda aybdor deb topildi va tayinlangan jazolarni qisman qo‘shish yo‘li bilan qat’iy o‘tash uchun 7 yil ozodlikdan mahrum qilish jazosi tayinlandi. Sudlanuvchidan davlat foydasiga 19 680 545 so‘m va olti nafar jabrlanuvchi foydasiga keltirilgan moddiy zarar summalari undirilishi belgilandi.

Akmal Mirzaxanov,

jinoyat ishlari bo‘yicha

Chilonzor tuman sudi raisi o‘rinbosari