Vazir: «Madaniy meros ob’ektlarini restavrasiya qilishda kunimiz mardikorlarga qoldi»

Senatning 21-yalpi majlisida moddiy madaniy meros ob’ektlarini asrash, restavrasiya qilish jarayoni, bunda kadrlar salohiyati bo‘yicha masalalar ko‘tarildi. Madaniyat vaziri Baxtiyor Sayfullayev shu mavzuda senatorlar tomonidan berilgan savollarga javob berdi.

“Madaniy meros ob’ektlarimizni restavrasiya qilishda kadrlar masalasi bizning eng og‘riqli nuqtamiz hisoblanadi. Hozir 7500 ga yaqin madaniy ob’ektlarning 259 tasining butkul yo‘qotilgan, tiklab bo‘lmaydi. Ularni restavrasiya qilishda bizda yetarli kadrlar yo‘q. Bu ishlar ko‘p yillardan beri mardikorlar tomonidan qilinadi. Kunimiz ularga qolib ketdi. Restavrasiya – bu ilm, alohida malaka talab qiladi. 1984 yilgacha respublikada restavrasiya institutida bo‘lgan. Ayrim sabablarga ko‘ra shu ta’lim muassasasini yo‘q qildik. Xorijliklar menga restavrasiya instituti nima uchun yo‘q, deb savol berishadi. Qanday javob berishni bilmayman. Kamoliddin Behzod nomidagi Milliy rassomlik va dizayn instituti va Toshkent arxitektura-qurilish institutida restavrasiya bo‘yicha shu o‘quv yilida kafedra ochish bo‘yicha Oliy ta’lim vazirligiga taklif kiritganmiz.”

Vazirning qo‘shimcha qilishicha, Buxoro davlat universiteti restavrasiya bilan shug‘ullanuvchi muhandislar yo‘nalishi ochildi. Restavrasiya ishlari lisenziya olmasdan amalga oshirildi. Shuning natijasida madaniy meros ob’ektlari qarovsiz qoldirildi.