O‘zbekistonning Mustaqillik deklarasiyasi qabul qilinganiga 30 yil to‘ldi

Kecha, 20 iyun kuni, Mustaqillik deklarasiyamiz qabul qilinganiga 30 yil to‘ldi. Mustaqillik deklarasiyasi O‘zbekiston Oliy Kengashi tomonidan 1990 yil 20 iyunda e’lon qilingan edi.

Keyinchalik Mustaqillik deklarasiyasi asosida «O‘zbekiston Respublikasining Davlat mustaqilligi asoslari to‘g‘risida»gi qonun qabul qilindi.

Quyida Mustaqillik deklarasiyasining matnini havola qilamiz:

MUSTAQILLIK DEKLARASIYASI

O‘zbekiston Sovet Sosialistik Respublikasi Oliy Soveti: o‘zbek xalqining davlat qurilishidagi tarixiy tajribasi va tarkib topgan boy an’analari, har bir millatning o‘z taqdirini o‘zi belgilash huquqini ta’minlashdan iborat oliy maqsad haqi, har bir kishining farovon hayot kechirishini ta’minlashni oliy maqsad deb bilgan holda, O‘zbekiston xalqlarining kelajagi uchun tarixiy mas’uliyatni chuqur his etgan holda, xalqaro huquq qoidalariga, umumbashariy qadriyatlarga va demokratiya prinsiplariga asoslanib, O‘zbekiston Sovet Sosialistik Respublikasining Davlat mustaqilligini e’lon qiladi.

O‘zbekiston SSRning demokratik davlat mustaqilligi Respublikaning o‘z hududida barcha tarkibiy qismlarida va barcha tashqi munosabatlardagi tanho hokimligidir.

O‘zbekiston SSRning davlat hududi chegarasi daxlsiz va bu hudud xalqning muhokamasiga qo‘yilmay turib, o‘zgartirilishi mumkin emas.

O‘zbekiston SSRda davlat hokimiyati uning hududiga kiradigan barcha tarkibiy va bo‘linmas qismlari ustidan amalga oshiriladi va shu hududda yashaydigan aholiga taalluqlidir.

SSSR Oliy Soveti qabul qiladigan qarorlar O‘zbekiston SSR Konstitusiyasiga muvofiq O‘zbekiston SSR Oliy Soveti tomonidan tasdiqlanganidan keyingina O‘zbekiston SSR hududida kuchga ega bo‘ladi.

O‘zbekiston SSR davlat hokimiyati vakolatiga O‘zbekiston SSR ichki va tashqi siyosatiga tegishli barcha masalalar kiradi.

O‘zbekiston SSR xalqaro huquqning asosiy prinsiplarini tan oladi va hurmat qiladi.

O‘zbekiston SSR ittifoqdosh respublikalar va boshqa davlatlar bilan o‘zining siyosiy, iqtisodiy, madaniy va boshqa munosabatlarini shartnomalar asosida belgilaydi va amalga oshiradi.

O‘zbekiston SSR o‘zining taraqqiyot yo‘lini, o‘z nomini belgilaydi va davlat belgilarini(gerb, bayroq, madhiya) o‘zi ta’sis etadi.

Qoraqalpog‘iston Muxtor Sovet Sosialistik Respublikasi mustaqilligini Muxtor Respublika Konstitusiyasi ta’min etadi. O‘zbekiston SSR uning Asosiy Qonuni va O‘zbekiston SSR Konstitusiyasi asosida Qoraqalpog‘iston MSSR manfaatlarini himoya qiladi.

O‘zbekiston SSRning qonun chiqaruvchi hokimiyati O‘zbekiston SSR davlat mustaqilligini amalga oshirish uchun zarur bo‘lgan qonunlarni ishlab chiqadi, O‘zbekiston SSRning siyosiy va iqtisodiy sistemalari tarkibini va qurilishini belgilaydi.

O‘zbekiston SSR Oliy Soveti umumxalq muhokamasi asosida demokratik huquqiy davlat tuzishga qaror qilganini bildiradi, O‘zbekiston SSRda yashayotgan barcha millat va elatlarning qonuniy, siyosiy, iqtisodiy, etnik, madaniy huqukdariga hamda ona tillari rivojlantirilishiga kafillik beradi.

Ushbu Deklarasiya O‘zbekiston SSRning yangi Konstitusiyasini hamda yangi ittifoq shartnomasini ishlab chiqish uchun asosdir.

Ushbu deklarasiya O‘zbekiston SSR Oliy Sovetining 1990 yil 20 iyunda bo‘lib o‘tgan ikkinchi sessiyasida qabul qilingan
P.S.: nima uchun Mustaqillik deklarasiyasining matni LexUz bazasidan o‘chib ketibdi. Bunday sahifa mavjud emas demoqda, deb yozadi Xushnudbek o‘zining "Telegram" dagi sahifasida.