O‘zbekistondagi ikki OTM dunyo universitetlari TOP-1000 taligiga kirdi
Ilk bor O‘zbekistonning bir yo‘la 2 oliygohi dunyoning eng nufuzli universitetlari TOP-1000 ro‘yxatidan o‘rin oldi.
Buyuk Britaniyaning nufuzli “QS Quacquarelli Symonds” xalqaro reyting agentligi dunyodagi eng yaxshi universitetlar reytingi – “QS World University Rankings-2025” natijasini e’lon qildi.
Reytingda birinchi marta O‘zbekistonning ikki oliy ta’lim muassasasi – “Toshkent irrigasiya va qishloq xo‘jaligini mexanizasiyalash muhandislari instituti” Milliy tadqiqot universiteti 547-o‘rin, Mirzo Ulug‘bek nomidagi O‘zbekiston milliy universiteti 781-o‘rinda qayd etildi.
“TIQXMMI” Milliy tadqiqot universiteti “Akademik nufuz” ko‘rsatkichi bo‘yicha eng yaxshi 300 ta oliy o‘quv yurti qatoriga va Markaziy Osiyodagi eng yaxshi universitetlar uchligiga kirdi.
O‘zMU “Chet ellik o‘qituvchilar ulushi” ko‘rsatkichi bo‘yicha 200 eng kuchli universitet sifatida Markaziy Osiyoda ikkinchi o‘rinni egalladi.
