O‘zbekistonda chet el investisiyasi ishtirokidagi korxonalar soni 16 mingdan oshdi

2025 yilning 1 iyun holatiga ko‘ra, O‘zbekistonda 16 405 ta chet el investisiyasi ishtirokidagi korxona faoliyat yuritmoqda. Bu haqda Milliy statistika qo‘mitasi ma’lum qildi. Ushbu ko‘rsatkich o‘tgan yilning mos davriga nisbatan 14,3 foizga ko‘paygani qayd etildi.

Mavjud korxonalarning 4 087 tasi qo‘shma korxona, 12 318 tasi esa to‘liq xorijiy kapital ishtirokidagi kompaniyalardan iborat. Ular iqtisodiyotning turli sohalarida faoliyat yuritmoqda va mamlakatdagi ishbilarmonlik muhitining jozibadorligidan dalolat beradi.

Chet el sarmoyadorlari orasida Xitoy yetakchilik qilmoqda — bu davlat kapitali ishtirokida 4 068 ta kompaniya faoliyat yuritmoqda. Rossiyalik sarmoyadorlar ishtirokida 3 086 ta, Turkiyadan — 1 997 ta, Qozog‘istondan — 1 136 ta korxona mavjud.

Shuningdek, Afg‘oniston (682 ta), Janubiy Koreya (674 ta), BAA (368 ta), Hindiston (326 ta) va AQSh (320 ta) sarmoyadorlari ham o‘z bizneslarini O‘zbekistonda yo‘lga qo‘yganlar.

So‘nggi yillarda mamlakatda investisiya muhiti yaxshilanib, xalqaro biznes uchun qulay sharoitlar yaratildi. Turli forum va ikki tomonlama muzokaralar orqali chet el sarmoyalari faol jalb etilayotgani natijasida, O‘zbekistonda investisiya jozibadorligi ortib bormoqda.