O‘zbekistonda bukmekerlik kontorlari reklamasi joylashtirilgan 30 ga yaqin sayt bloklandi

Joriy yil boshidan buyon Raqobat qo‘mitasi tomonidan 42 ta veb-resursni blokirovka qilish bo‘yicha so‘rovlar kiritilgan.

Raqobatni rivojlantirish va iste’molchilar huquqlarini himoya qilish qo‘mitasi internet tarmog‘ida qimor va xavfli o‘yinlar sohasidagi monitoring natijalari haqida ma’lum qildi.

Nazorat qiluvchi organ bukmekerlik xizmatlarini reklama qiluvchi resurslardan foydalanishni cheklash choralarini ko‘rmoqda. Ularni tezkorlik bilan amalga oshirish uchun Axborot va ommaviy kommunikasiyalar agentligi bilan hamkorlik yo‘lga qo‘yilgan.

Yil boshidan buyon AIMKga bukmekerlik idoralarini targ‘ib qiluvchi 42 ta saytni blokirovka qilish bo‘yicha takliflar kiritilgan. Shundan 30 ga yaqini belgilangan tartibda bloklandi.

2023 yil sentyabr oyida Raqobat qo‘mitasi bukmekerlik va lotereyalarni targ‘ib qiluvchi 27 ta sayt bloklanganligini e’lon qildi. Shu bilan birga, boshqarma tomonidan 553 ta bukmekerlik xizmatlarini tashqi reklama qilish holatlari aniqlangan.

Aprel oyida O‘zbekistonda 2025 yildan boshlab qimor, lotereya va bukmekerlik faoliyatini qonuniylashtirish to‘g‘risida Prezident farmoni e’lon qilingan edi. Ilg‘or loyihalar bo‘yicha milliy agentlik (NAPP) ushbu faoliyatni tartibga soladi va lisenziyalaydi.

Lotereyalar, onlayn o‘yinlar va bukmekerlik garovlarini tashkil qiluvchi yuridik shaxslar 5 yil davomida aylanma solig‘ini umumiy daromaddan to‘langan yutuq va qaytarilgan garovlarni ayirib tashlagan holda 4% miqdorida to‘laydi. Fuqarolarning yutuqdan olingan daromadlari jismoniy shaxslardan olinadigan daromad solig‘iga tortilmaydi.

NAPP qimor o‘yinlarini qonuniylashtirish qarorini xorijiy va noqonuniy xizmatlardan foydalanish tufayli «taqiqlar aslida ishlamaydi» deb tushuntirdi. Agentlik sohaning o‘ziga xos xususiyatlari bilan bog‘liq bo‘lgan foydani hisoblashda suiiste’mol qilish xavfi tufayli ushbu sohaga daromad solig‘i va QQSni joriy etish maqsadga muvofiq emasligini tan oldi.