O‘zbekistonda birinchi ziyoratchilar Toshkentdan Madinaga uchib ketdi
O‘zbekistonda birinchi ziyoratchilar 2023 yilgi Haj ziyoratini ado etish uchun Toshkentdan Madinaga uchib ketishdi. Bu haqda “Uzbekistan Airports” xabar berdi.
Ta’kidlanishicha, 3 iyundan 4 iyunga o‘tar kechasi mahalliy vaqt bilan soat 02:00 da 240 nafar ziyoratchi Toshkentdan Madinaga (Saudiya Arabistoni) uchib, 2023 yilgi Haj mavsumini ochdi.
4-19 iyun kunlari O‘zbekistonning 10 ta shahridan Madinaga parvozlar amalga oshiriladi.
“Bu yil eng ko‘p ziyoratchilar Toshkentdan Hajga boradi — 16 reysda 5575 nafar yo‘lovchi tashiladi. Namangandan 14 ta, Farg‘onadan 6 ta, Samarqanddan 4 ta, Buxoro, Urganch, Qarshi va Termizdan 3 tadan reys, shuningdek, ziyoratchilar bilan 2 ta reys Navoiydan, Nukusdan esa 1 ta reys amalga oshiriladi. O‘zbekistondan jami 15130 nafar ziyoratchi Haj ziyoratini ado etadi”, - deyiladi xabarda.
Qayd etilishicha, poytaxt havo bandargohida qo‘shimcha shart-sharoit va qulayliklar yaratildi — jo‘nab ketish zalining steril zonasida bir vaqtning o‘zida 80 va 60 kishini sig‘dira oladigan ikkita, erkaklar va ayollar uchun namozxona ochildi. Bundan tashqari, ibodatxonalar oldida tahorat olish uchun — erkaklar va ayollar uchun ham maxsus xonalar mavjud. Shu bilan birga, hojatxonalarning katta bloki foydalanishga topshirildi.
