Turkiyadagi eng chiroyli 5 ta sayohat maskani: o‘rmonlar, dengizlar va qadimiy shaharlarning turfa manzaralari

Aytishlaricha, qayerga borishingizdan qat’i nazar, Turkiya sayohatingizning eng yaxshi qismi bo‘lib ajralib turadi. Turkiya doim eng yaxshisini taklif qiladi.

O‘rta Yer dengizi, Egey va Qora dengiz bilan o‘ralgan bu ulug‘vor va jannatmakon hudud ajoyib manzaralari va yam-yashil landshaftlari, tarixiy xazinalari va milliy taomlari bilan ajralib turadi.

Sayohatni mashina yoki avtobusda, do‘stlaringiz yoki oila a’zolari bilan qilasizmi, bu besh ajoyib sayohat yo‘nalishlari ta’tilingizni maroqli o‘tkazishingizga yordam beradi.

Chanakkale — Ayvalik

Shimoliy Egey dengizining panoramik manzaralari bilan Chanakkale-Ayvalik yo‘nalishi mintaqaning ulkan va takrorlanmas madaniy merosi, ajoyib tabiati va toza plyajlari bilan ajralib turadi.

Yorqin ko‘k va yashil rangdagi go‘zal landshaftlar, tarihdan so‘zlab beruvchi qadimiy shaharlar va takrorlanmas ta’mga ega mahalliy mahsulotlari mintaqani velosiped, motosikl, avtomobil yoki karvonlarda sayohat qiluvchilarning e’tiborini jalb qilishning bir nechta sabablaridan biridir.

Sayohatning boshlang‘ich nuqtasi bo‘lgan Chanoqqal’a, qadimiy asotirlari va go‘zal tabiati bilan maftun qiladi. Shaharga quyuq o‘rmon bilan qoplangan Gelipoli yarim oroli orqali kirasiz.

Sayohatchilar qadimgi Yunon yozuvchisi Gomerning «Iliada» va «Odisseya» dostonlari izlari saqlanib qolgan qadimiy Chanoqqal’ada mintaqaning ming yillik tarixiga guvoh bo‘lasiz.

Troyaning qadimiy shahar xarobalari tashqarisida “2020 yil Yevropa muzeyi” maxsus mukofoti va “2020/2021 Yevropa muzey akademiyasi maxsus mukofoti” laureati bo‘lgan mashhur Troya muzeyi joylashgan.

Qadimgi Troya shahri ham Turkiyadan boshlanadigan Yevropa Kengashi tomonidan ro‘yxatga olingan birinchi va yagona madaniy yo‘nalish bo‘lgan Aeneas yo‘lining birinchi bekatidir.

Afsonaviy Aeneas - Rim asoschisi Rem va Romulning ajdodi otasi va o‘g‘li bilan yonayotgan Troya shahridan qochib, Gresiya, Albaniya va Tunisni kesib o‘tib, nihoyat o‘zi qurgan kemalarda Italiyaga yetib kelgani aytiladi. Hudud tabiiy va arxeologik hududlar va mahalliy landshaftlarni o‘z ichiga oladi. Ularning ba’zilari YUNESKOning Jahon merosi ro‘yxatiga kiritilgan.

Chanoqqal’aning janubiy qismidagi Ayvajik tumanida joylashgan Assos qadimiy shahar xarobalari ham haligacha saqlanib qolgan tarixiy obidalari bilan sayyohlarni o‘ziga jalb qiladi.

Assosdagi ko‘rfaz va plyajlar bo‘ylab sayr qilganingizdan so‘ng, o‘zining ajoyib tosh uylari bilan ajralib turuvchi hududning katta va kichik qishloqlariga tashrif buyuring.

Keyin esa, dam olishning yangicha usuli bo‘lgan «glamping» uchun albatta Assos ko‘rfazidagi Sivrijeda to‘xtang.

Zaytun daraxtlari bilan o‘ralgan Gomer dostonlarining timsoli Ida tog‘i tabiat qo‘ynida yolg‘iz oqshom o‘tkazish uchun ajoyib joy.

Ayvalik yo‘lidagi oxirgi bekat esa, Edremit tumanidagi ajoyib dengiz bo‘yidagi Altinoluk shaharchasi hisoblanadi.

Ida tog‘i milliy bog‘i, Sutuven sharsharasi, Hasanbo‘g‘du ko‘li va Shahinderesi kanyoni kabi ko‘plab tabiiy mo‘’jizalarni o‘zida mujassam qilgan bu unumdor yerlarda mashhur kurort markazlari joylashgan.

Edremit yaqinidagi Gure shaharchasi har yili dunyoning turli mamlakatlaridan ko‘plab sayyohlarni o‘ziga jalb qiladi.

Ayvalik — Cheshme yo‘nalishi

Ayvalikdan keyin Madra tog‘lari etaklari va Bergama yo‘lini kuzatib, qadimgi Pergamon shahrini kashf qilishingiz mumkin. Egeyning yuragi hisoblangan Izmirda sizning keyingi manzilingiz tarixiy Focha shahri bo‘ladi.

Eski Focha deb nomlangan tarixiy hududga ega Focha shaharchasi go‘zal burilishli yo‘llar va hayratlanarli manzaralarga ega.

Gomer dostonlarida ham tilga olingan Focha hududi avvaldan baliq ovlash portlari va mazali dengiz mahsulotlari bilan mashhur bo‘lgan.

Sayohat uchun yana bir ajoyib manzil – Urla, Izmir viloyatida joylashgan bo‘lib, shaharcha sharqda Guzelbahche va Seferihisar, g‘arbda Cheshme, shimoli-g‘arbda Karaburun va Egey dengizi, shimolda Izmir ko‘rfazi va janubda Egey dengizi bilan o‘ralgan.

Urla o‘zining go‘zal tabiati bilan bir qatorda ma’zali taomlar tayyorlanadigan restoranlari bilan ham mashhurdir.

Mazkur yo‘nalish shuningdek "sekin shahar" Seferihisar, dengiz-qum-quyosh turizmi markazi Kushadasi, ajoyib mahalliy vinolar tayyorlanadigan Shirinje kabi shaharlarni ham o‘z ichiga oladi. Va, albatta, Miletos, Priyene va Efesning qadimiy shaharlari va Ilohiy Maryam cherkovlari turistlar diqqatni tortadi. Ushbu yo‘nalishdagi so‘nggi bekat - Izmir yaqinidagi mashhur dengiz bo‘yidagi dam olish maskani Cheshme va surfing maktablari va tosh uylari bilan mashhur go‘zal Alachati kurorti hisoblanadi.

Kalkan — Antaliya

O‘rta Yer dengizi bo‘yidagi yana bir qiziqarli sayohat manzillaridan biri Kalkan-Antaliya yo‘nalishi hisoblanadi.

Bu yer o‘zining tiniq suvlari, go‘zal ko‘rfazlari va yam-yashil tog‘lari bilan ajoyib manzarani yaratadi. Noyob landshaftlar va qadimiy sivilizasiyalar izlaridan iborat bu hudud unutilmas sayohatingiz uchun xizmat qiladi.

Patara, Kalkan va Kash, Olimpos, Chirali va Antaliyaning insonni lol qoldiruvchi go‘zalligini ko‘z bilan ko‘rmasdan turib, sayohat to‘liq bo‘lishi mumkinmi?

Qadimiy shahri va 12 kilometr uzunlikdagi plyajiga ega bo‘lgan Patara, shubhasiz, mintaqaning eng ajoyib joylaridan biridir. Qadimgi Likiyaning eng muhim shaharlari qatorida sanalgan Patara antik teatr, parlament binosi, dengiz chirog‘i, shahar archasi, ustunli ko‘cha, ibodatxonalar va cherkovlar kabi inshootlari bilan o‘zining qadimiy ulug‘vorligini saqlab qolgan.

Patara shuningdek, Santa Klaus nomi bilan ham tanilgan Aziz Nikolayning tug‘ilgan joyidir.

Nikolay ko‘p yillar yepiskop bo‘lib xizmat qilgan va avliyolikka erishgan Demre shaharchasi, bu mashhur yo‘nalishdagi yana bir tarixiy sayohat manzillaridan biri hisoblanadi. Demreda Aziz Nikolayning qabri, shuningdek O‘rta asrlarda mashhur bo‘lgan tarixiy cherkov ham bor.

Agar siz O‘rta Yer dengizining durdonasi bo‘lgan Antaliyaga sayohat qilsangiz, unda sizni O‘rta Yer dengizi qirg‘og‘idagi Kash shahrining yanada ajoyib manzaralari kutmoqda.

Bu yerda siz, Kash-Kalkan yo‘lidagi kichkina kanyon og‘zi plyaji bo‘lgan Kaputash va Chirali qirg‘oq qishloqlarining ajoyib manzaralaridan bahramand bo‘lishingiz mumkin.

Turkiyaning va dunyoning eng nufuzli sho‘ng‘ish turizm markazlaridan biri bo‘lgan Kashda, moviy chuqurliklarni kashf qilishingiz yoki Kekovada qayiq safarlarida suv ostidagi qadimiy O‘rta Yer dengizi sivilizasiyalari izlarini ko‘rishingiz mumkin.

Kashning tiniq suvlari bilan xayrlashib, yana yo‘lga chiqqaningizda, keyingi bekatingiz Chirali bo‘ladi. Karetta dengiz toshbaqalari uchun yashash joyi, tinch va osoyishta Chirali, shuningdek, Likiyaning muhim porti bo‘lgan Olimpos antik shahri xarobalari yaqinida joylashgan.

Sayohatning oxirgi bekati bo‘lgan Antaliyada bir necha kun bo‘lishingiz kerak. Dengiz-qum-quyoshdan iborat tabiat va ko‘hna tarixning mukammal uyg‘unligini o‘zida mujassam qilgan bu shahar albatta ko‘rishingiz kerak bo‘lgan joylardan biridir.

O‘rta Yer dengizi sivilizasiyalarining noyob asarlari ajoyib tarzda namoyish etilgan Antaliya arxeologiya muzeyi esa, bu yerga tashrif buyurishingiz uchun yana bir sabab hisoblanadi.

Eskishehir — Isparta

Bu marshrut o‘zining jo‘shqin shahar hayoti bilan kundan-kunga yorqinroq porlayotgan Eskishahardan Anado‘lining tabiiy va zamonaviy go‘zalliklarini taqdim etuvchi atirgullar shahri Ispartagacha cho‘zilgan.

Yo‘nalishning boshlang‘ich nuqtasi bo‘lgan Eskishaharda, YUNESKOning Jahon merosi ob’ektlari taxminiy ro‘yxatiga kiritilgan Odunpazari tarixiy shahar markazi va mintaqaning an’anaviy hunarmandchiligi namunalarini ko‘rishingiz mumkin bo‘lgan Atlihan hunarmandchilik bozoriga tashrif buyuring.

Bundan tashqari, bu shaharda yojlashgan Sepiolit (Meerschaum) muzeyi dunyodagi sepiolite toshlaridan yasalgan ashyolar namoyish qilinadihan yagona muzey hisoblanadi.

Eskishahardan chiqib, Isparta tomon yo‘l olgach, betakror tabiat manzaralariga duch kelasiz. Ispartaning “sekin shahar” maqomini olgan shaharlari Yalvach va Eg‘irdir; Kovada ko‘li milliy bog‘i, yuzlab qush turlarining yashash joyi; Turkiyaning noyob krater ko‘llaridan birini o‘z ichiga olgan Go‘ljuk Tabiat Parki; Eg‘irdir ko‘li, quyosh botishining hayratlanarli manzaralari va lavanta bog‘lari bilan ko‘zni qamashtiruvchi Kuyujak qishlog‘i shular jumlasidan.

Bu marshrutda, shuningdek, nasroniylik tarixidagi birinchi missioner Avliyo Pol o‘zining o‘zining missionerlik sayohatlari chog‘ida bosib o‘tgan yo‘llarni ham o‘z ichiga oladi. Avliyo Polning yo‘li, Likiya yo‘li bilan bir qatorda Anado‘lidagi eng mashhur sayohat yo‘llaridan biridir.

Bolu — Chamlihemshin

Bu marshrut Rizening baland tog‘ jannati Chamlihemshin tomon o‘zining ajoyib ko‘llari bilan mashhur bo‘lgan Bo‘ludan boshlanadi va Qora dengizning go‘zal qirg‘oq chizig‘i ulug‘vor landshaftlarni - ajoyib yashil o‘rmonlarni va jozibali suvlarni o‘z ichiga oladi.

Agar istasangiz sayohatingizni Boluning go‘zallikda tengi yo‘q Yedigo‘ller milliy bog‘idan boshlang va so‘ngra dafna derazalari bo‘lgan yog‘och uylar bilan qoplangan tor ko‘chalardan iborat Safranbolu tomon yo‘l oling.

Yam-yashil Kastamonu va o‘zining tabiiy go‘zalligi bilan hayratga soladigan tarixiy port shaharlari Sinop va Samsun bu go‘zal marshrutning boshqa bekatlari hisoblanadi.

Ushbu mashhur marshrutning keyingi bekati Qora dengizning jo‘shqin va salqin suvlari va yam-yashil o‘rmonlarini o‘zida mujassam qilgan Ordu shahri hisoblanadi.

Pershembe va Chambashi platolari, Chiseli va Uzundere sharsharalari va Geyilmez kanyoni, zamonaviy hayot soddalik bilan go‘zal uyg‘unlashgan Yeshilje qishlog‘i Orduning diqqatga sazovor joylari hisoblanadi.

Bu marshrutda sizni, shuningdek, Trabzondagi Sumela monastiri kutmoqda. Tik qoya bag‘rida joylashgan ushbu pravoslav monastiri YUNESKOning Jahon merosi ob’ektlariga nomzodlar ro‘yxatiga kiritilgan.

Bu marshrutdagi oxirgi to‘xtash manzilingiz Chamlihemshinda esa sizni ertaklardagi kabi go‘zal tabiat manzaralarini o‘zida mujassam qilgan Ayder, Pokut, Gito va Sal platolari kutmoqda.

Bundan tashqari, ko‘plab shifobaxsh giyohlar va organik mahsulotlar bilan boyitilgan Qora dengiz mintaqasi oshxonasi esa sayohatingizni yanada ajoyib qiladi.