Tramp Kanadani 51-shtatga aylantirish g‘oyasini ilgari surishda davom etmoqda

Avvalroq AQShning saylangan prezidenti Donald Tramp Kanadani Amerikaning 51-shtatiga aylantirishni “ajoyib g‘oya” deb bilishi haqida xabarlar tarqalgan edi. Bu haqda Newsweek xabar beradi.

Joriy yilning 30 noyabr kuni Kanada bosh vaziri Jastin Tryudo AQShning saylangan prezidenti Kanada va Meksika tovarlariga 25 foizlik boj joriy etish bilan tahdid qilganidan keyin Floridadagi Mar-a-Lago qarorgohida Donald Tramp bilan uchrashdi.

Nomi oshkor etilmagan manbalarga ko‘ra, Tramp go‘yoki Tryudoga bu g‘oya yoqmasa, Kanada Tryudo gubernator bo‘lgan 51-shtatga aylanib, tarifdan qochishi mumkinligi haqida hazil qilgan.

Tramp tarafdorlari tasdiqlanmagan mish-mish sifatida qabul qilingan “yomon” hazilni ijtimoiy tarmoqlarda faol ravishda tarqatishdi. Biroq, Donald Tramp o‘zining Truth Social ilovasida tog‘ cho‘qqisida Kanada bayrog‘i yonida turgani va boshqa cho‘qqiga ( Alp tog‘laridagi Matterxornga) qarab turgani haqidagi memni joylashtirib, hazilga qo‘shib qo‘ydi: “Oh, Kanada!". Ammo vaziyat yangi tus oldi.

- Hech kim javob bera olmaydi, nima uchun biz Kanadaga yiliga 100 000 000 dollardan ortiq subsidiya beramiz? Bu ma’nosiz! Ko‘pgina kanadaliklar Kanadaning 51-shtat bo‘lishini xohlashadi. Ular soliqlar va harbiy himoyani sezilarli darajada tejashadi. Menimcha, bu ajoyib g‘oyadir. 51-shtat!!! - Donald Tramp chorshanba kuni ertalab «Truth Social» veb-saytida.

Biroq Kanadaning ittifoqqa kirishi yo‘lida muhim amaliy va siyosiy to‘siqlar mavjud. Kanadaning «Elections Canada» bo‘yicha maslahatchisi Gregori Tardi The National Post nashriga bergan intervyusida Kanadaning 1982 yilgi Konstitusiyasining 41-bo‘limiga ko‘ra, bu g‘oya nazariy jihatdan mumkin ekanligini aytdi. Uni amalga oshirish uchun Kanada parlamentining ikkala palatasi va mamlakatning barcha 10 provinsiyasi qo‘llab-quvvatlashi kerak bo‘ladi. Bunga fransuz tilida so‘zlashuvchi Kvebek kiradi, u o‘z siyosiy madaniyatiga ega va fransuz tilida so‘zlashuvchilarning ta’siriga putur yetkazishi mumkin bo‘lgan har qanday narsadan chuqur shubhalanadi.

Kanada Konstitusiyasi ham mahalliy xalqlarining huquqlarini himoya qiladi. Demak, Amerika ittifoqiga kirish uchun turli guruhlar bilan maslahatlashish kerak bo‘ladi. Bunday maslahatlashuvlar huquqiy kurashlarni keltirib chiqarishi mumkin. Garchi konstitusiyaviy talab bo‘lmasa-da, 1980 va 1995 yillarda Kvebek plebissitlar orqali Kanadaning bir qismi bo‘lib qolish uchun ovoz berdi. Shunday qilib, presedent yaratildi: konstitusiyaga kiritilgan asosiy o‘zgarishlar referendumda xalqning ma’qullanishini talab qiladi.

Aytish joizki, Jastin Tryudoning mashhurligi pasayib bormoqda - uning reytingi 30 foizga yaqinlashmoqda.

Biroq, AQShning Kanadani bosib olishga urinishlari tarixi muvaffaqiyatli ko‘rinmaydi. Buni qilishga uringan oxirgi odam 1812 yilgi urush paytida prezident Jeyms Madison edi. Uning urinishlari Britaniya qo‘shinlari tomonidan qaytarildi.