Toshkentda "Tez yordam" haydovchisining qoidaga bo‘ysunmagani bemor ayolga qimmatga tushdi

Inson hayot chorrahalarida bilib-bilmay xatoliklarga yo‘l qo‘yishi oqibatida yaxshigina dars oladi. Bu jarayonda eng muhimi to‘g‘ri xulosa chiqara olishda. Biroq shundaylar borki, boshi devorga bir marotaba urilgan bo‘lishiga qarmay, yana o‘sha “ko‘cha”ga kiraveradi. 39 yoshli “qahramoni”miz ham ana shu toifa kishilardan. Yo‘qsa, bir gal “transport vositalari harakati yoki ulardan foydalanish xavfsizligi qoidalarini buzish” jinoyatini sodir qilib, keyin esa o‘zi odamlarning salomatligi yo‘lida kamarbasta bo‘ladigan shaxslardan biri bo‘la turib “qasddan badanga yengil shikast yetkazish” jinoyatiga qo‘l urmagan bo‘lardi. Ikki marotaba bilmay xato qilganda, dersiz. Lekin uchinchi bor ham ayni birinchi xatosini takrorlaganiga nima deysiz?

Gap shundaki, sudlanuvchi tez tibbiy yordam avtomashinasi haydovchisi. Voqea sodir bo‘lgan kuni kechki soat 19:30 larda “Damas” rusumli tez tibbiy yordam avtomashinasida Olmazor tumani, A.Qodiriy ko‘chasi tomonidan Qorasaroy-Nurafshon ko‘chalari kesishgan chorrahasi tomonga harakatlanib borgan. Unga nisbatan svetoforning qizil chirog‘i yonishiga qaramasdan, yo‘lning qarama-qarshi tomoniga chiqib, unga nisbatan boshqa harakat qatnashchilarining yo‘l berganligiga to‘liq ishonch hosil qilmasdan, Yo‘l harakati qoidalarining 25, 77-bandlari talablariga rioya qilmay chorrahani kesib o‘tayotgan vaqtida, unga nisbatan o‘ng tomondan, ya’ni Sebzor-Nurafshon ko‘chalari bo‘ylab harakatlanib kelib svetoforning yashil chirog‘iga o‘z harakatini boshlayotgan haydovchi boshqaruvidagi “Lasetti” rusumli avtomashinasi bilan to‘qnashuv sodir qilgan. Natijada “Damas”da bo‘lgan yo‘lovchi ayol og‘irlik darajasiga ko‘ra hayot uchun xavfli bo‘lgan og‘ir tan jaroxati olgan.

Biroq sudlanuvchi sud majlisida aybiga iqror bo‘lmagan.

— Ish joyimdan yordamchi kuch sifatida ishga jo‘natildim va menga “Damas” rusumli tez tibbiy yordam avtomashinasi biriktirildi. Voqea sodir bo‘lgan kuni soat 18:30 larda Olmazor tumani Qorasaroy ko‘chasidagi uydan xabar tushgach, shifokorlar bilan manzilga yetib bordik. Ushbu xonadonda 2 nafar kasallangan bemor bor edi. Ularga tez tibbiy yordam ko‘rsatish kerakligini inobatga olib, shifokor ko‘rsatmasiga asosan ularni 2-Toshkent tibbiyot akademiyasiga olib ketdik. “Damas”da kechiktirib bo‘lmaydigan xizmat vazifasini bajarish uchun ko‘k va qizil rangli yalt-yalt etuvchi chiroq-mayoqchasi yoqilgan va maxsus tovushli ishorani yoqqan holda, Olmazor tumani Qorasaroy ko‘chasi bo‘ylab 50 km/soat tezlikda harakatlandim. Yonimda o‘tirgan shifokor sirenani yoqqan holda “rupr”da gapirib keldi. Yo‘nalishim bo‘yicha oldinda chorrahagacha avtomashinalar ko‘pligi sababli yo‘lning qarama-qarshi tomoniga chiqib, chorrahaga kirib bordim. Qorasaroy-Nurafshon ko‘chalari kesishgan chorrahaga kelib, avval chap tomondan kelayotgan qator avtomashinalar meni o‘tkazib yuborishi uchun to‘xtaganim sababli chorrahaga kirib, chorraha o‘rtasida to‘xtab, ko‘chaning o‘ng tomonidan, ya’ni Sebzor ko‘chasi tomonidan kelayotgan avtomashinalar to‘xtab meni o‘tkazib yuborayotganligini ko‘rib, oldinga 30 km/soat tezlikda harakatlanib, chorraha chegarasidan chiqib ketish uchun juda kam masofa qolganida menga nisbatan o‘ng tomonidan harakatlanib kelayotgan haydovchi boshqaruvidagi “Lasetti” avtomashinasi meni o‘tkazib yubormasdan, chorrahaga harakatlanib kirdi. Natijada to‘qnashuv sodir qildi, “Damas” avtomashinasi ag‘darilib ketdi. Chorrahaga qizil chiroqda kirmadim, u haydovchi boshqaruvidagi “Lasetti”ning yo‘nalishi bo‘yicha haydovchini oldida boshqa avtomashinalar bo‘lmagan. Shu sababli uni to‘qnashuvgacha yo‘nalishi bo‘yicha uch yoki to‘rtta avtomashina to‘g‘riga o‘tib ketgan, - deydi sudlanuvchi.

Qaynonasi ikkalasi “COVID-19” infeksiyasi bilan kasallanganligi sababli tez tibbiy yordam chaqirganini ma’lum qilgan jabrlanuvchi ham o‘sha kuni shifokorlar ularni “Damas” tez tibbiy yordam avtomashinasida shifoxonaga olib ketishayotganida to‘qnashuv sodir bo‘lganini ma’lum qilgan.

— “Damas” avtomashinasi ag‘darilib, bizni boshqa tez tibbiy yordam avtomashinaga ortib shifoxonaga olib ketishdi. Men “Damas”ning orqa tarafida o‘tirganim sababli “Lasetti” rusumli va “Damas” rusumli avtomashinalarning harakatini aniq ko‘rmadim. YTH natijasida og‘ir tan jaroxati oldim, - deydi yo‘l transport hodisasi natijasida uni sog‘lig‘ini tiklash uchun amalga oshirilgan jarrohlikda 36 129 933 so‘m moddiy zarar yetkazilganini va unga yetkazilgan ma’naviy zarar miqdori 20 000 000 so‘mni tashkil qilishini bildirgan jabrlanuvchi. — Sog‘lig‘imga shikast yetkazilganligi oqibatida mehnatga yaroqsiz bo‘lib, ishlay olmayotganim bois 8 000 000 so‘m ish haqini yo‘qotib, mahrum bo‘ldim, - deya so‘zini davom ettirgan jabrlanuvchi moddiy, ma’naviy zararni hamda yo‘qotilgan ish haqini undirishni so‘radi.

Sudning hukmiga ko‘ra, sudlanuvchi Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 1-qismida nazarda tutilgan jinoyatni sodir qilganlikda aybli deb topildi. Unga ish haqining 15 foizini davlat daromadi hisobiga ushlab qolgan holda 1 yil 6 oy muddatga axloq tuzatish ishlari jazosi tayinlandi. Sudlanuvchidan Sog‘liqni saqlash bosh boshqarmasi maxsuslashtirilgan avtoxo‘jaligi davlat muassasasi foydasiga 10 297 120 so‘m, jabrlanuvchiga 15 603 223 so‘m moddiy va 5 575 000 so‘m ma’naviy zarar undirilishi belgilandi.

Xurshid Sodiqov,

jinoyat ishlari bo‘yicha Olmazor tuman sudi sudyasi