Toshkentda ayollarni Olmaotaga fohishalik bilan shug‘ullanish uchun sotmoqchi bo‘lganga hukm o‘qildi
“O‘rgangan ko‘ngil o‘rtansa qo‘ymas”, degan naql qanchalik haqiqat ekaniga quyidagi voqea sabab, yana bir karra amon bo‘lsangiz ajabmas. Biroq shuni ham unutmaslik kerakki, sayoq yursang, tayoq yeysan. “Qahramon”imizning o‘zi qiz farzandni tarbiya qila turib, qo‘lning kiri bo‘lgan pul uchun onalik va ayollik nomiga dog‘ tushirgani kishini o‘yga toldiradi...
Toshkent shahar IIBB TEQKB va Yashnobod tumani IIO FMB TEQKB tezkor xodimlari tomonidan ikki nafar ayolning arizasiga asosan tezkor tadbir o‘tkazildi. 33 yoshli ayol aldov yo‘li bilan ikki nafar tanishining ishonchiga kiradi. Qozog‘iston Respublikasi Olmaota shahridagi tanishlarini oldiga yuborib, dastlab ularga 250.000 tenge miqdorida majburiy ishlab berish, so‘ng har bir “mijoz”ni qabul qilgani uchun 10.000 tengeni tanishiga topshirish va topshirilgan pul miqdorini teng ikkiga bo‘lish va’dasida fohishalik bilan shug‘ullanishlariga ko‘ndiradi. Ikki ayolni Toshkent viloyatining Toshkent tumanida joylashgan “G‘ishtko‘prik” chegara maskani orqali yuborayotgan vaqtida ushlangan. Bu haqda Toshkent shahar sudining Jamoatchilik va OAV bilan hamkorlik bo‘yicha bosh konsultanti Sadoqat Allaberganova xabar qildi.
“QILMISHIMDAN CHIN KO‘NGILDAN PUSHAYMONMAN”
Sudlanuvchi sud majlisida aybiga to‘liq iqrorlik bildirdi...
— Taxminan 7 oydan buyon fohishalik bilan shug‘ullanaman. Shu maqsadda 2 marotaba Qozog‘istonning Olmaota shahriga borib kelganman. U yerda menga bir ayol qo‘shmachilik qilgan. Fohishalik qilib yurgan vaqtimda boshqa fohisha qizlar o‘zlari bilan tanishlarini olib kelib, u ayolga topshirganida, ularga qanchadir miqdorda pul berganini ko‘rganman. Keyin O‘zbekistonga qaytganimda bir ayol bilan tanishib qoldim. U ham fohishalik bilan shug‘ullangan. Unga Qozog‘istonga borib fohishalik qilishni taklif qilganman. Pulga muhtoj bo‘lgani sababli, tanishlarimni qo‘shmachi ayolga fohishalikka olib borishni, o‘zim ham fohishalik qilishimni va polisiyaga to‘lanishi lozim bo‘lgan puldan ozod bo‘lib, qizlarni olib borganimdan daromad olishimni o‘yladim. Tanishimning uyiga borib, unga Qozog‘istonga ketayotganimni, unga ham borishni taklif qilib, u yerda fohishalikdan oyiga 1000 AQSh dollarigacha topishi mumkinligini aytib qiziqtirdim. Shuningdek, unga dastlab 250.000 tenge badal pulini ishlab berishi kerakligi, so‘ng har bir mijozdan 5000 tenge, 1 soatlik “xizmat”dan 10.000 tenge olishi hamda ushbu ishlangan pulni yarmini o‘ziga olishini, kuniga 50.000 tenge ishlashi kerakligini tushuntirdim. Shu vaqtda tanishimning dugonasi kelib qoldi. U dugonasiga ham Qozog‘istonda fohishalik qilishni taklif qildi. Bungacha 15 nafar qizni Qozog‘istonga jo‘natib yuborganimni aytdim. Aslida bu gaplarni ularni qiziqtirish uchun aytgandim. Shundan so‘ng ikkovi rozi bo‘lishdi. Vaqtni belgilab, Qozog‘istonga ketishni rejalashtirdik. Ertasi kuni tanishimning uyida yig‘ildik va Toshkent tumanidagi chegara postga bordik. Ikkoviga chegarachi xodimlarda shubha uyg‘otmaslik uchun alohida-alohida bo‘lib o‘tishlarini, o‘zim esa ularning ortidan o‘tishimni aytdim. So‘ng men ichki ishlar organi xodimlari tomonidan ushlandim. Qilmishimdan chin ko‘ngildan pushaymonman, qilmishining oqibatini anglab yetgandim. Boshqa bu holatni takrorlamaslikka va’da beraman. Qaramog‘imda 11 yoshli qizim borligini inobatga olib yengil jazo tayinlashni so‘rayman.
“TOSHKENT SHAHAR IIBBGA ARIZA BERDIK”
Jabrlanuvchilardan biri esa sudda quyidagilarni bayon qildi...
— U ayol bilan 2019 yilning yoz oylaridan buyon tanishmiz, bir necha marotaba Qozog‘istonga borib, fohishalik bilan shug‘ullangan. Meni ham bir necha marotaba shu yo‘ldan yurishga ko‘ndirishga harakat qilgan, lekin Qozog‘istonga borib “ishlash”dan qo‘rqqanman. U uyimga kelib, yana Qozog‘istonga ketayotganini aytib, birga borishni taklif qildi. Qiziqib, qancha pul topishim mumkinligini so‘radim. Bir “mijoz”dan 5000 tenge olinishi, kuniga 50.000 tenge “plan” berishim kerakligini aytdi. Koreys millatiga mansub bo‘lganim sababli Qozog‘istonda menga talab ko‘p bo‘lishini aytib qiziqtirdi. Shu payt dugonam ham uyimga keldi. U ikkovimizni ko‘ndirishga harakat qildi. Dastlab Qozog‘istonga borilganda mahalliy polisiyani ko‘ndirish uchun 250.000 tengedan pul berish kerakligi, so‘ng ishlab topgan pullarni teng ikkiga, ya’ni yarmi qo‘shmachi ayolga, qolgan yarmi o‘zimizga qolishini aytdi. Taklifga rozi bo‘lib, ertasi kuni yana uyimda yig‘ilishdik. U bilan bo‘lgan so‘zlashuvlarni telefonimga yozib oldim. Shu kuni kech soatda dugonam menga qo‘ng‘iroq qilib, “tanishingning harakatlaridan shubhalanayoyapman. Odam savdosi qurboni bo‘lishimiz mumkin”, deb qoldi. Keyin ikkalamiz kelishib, tanishimning xatti-harakatlari yuzasidan chora ko‘rish haqida Toshkent shahar IIBBga ariza berdik...
Baxriddin IKRAMOV, jinoyat ishlari bo‘yicha Yashnobod tuman sudi sudyasi:
— Sudlanuvchi JKning 135-moddasi 2-qismi “b” bandi bilan JKning 57-moddasini qo‘llab, oylik ish haqining yigirma foizini davlat daromadi hisobiga ushlab qolgan holda 3 yil axloq tuzatish ishlari jazosi tayinlandi.
