Sirdaryoda shifokor kursdoshlarini giyohvandlik modda iste’mol qilishga undab kelgani ma’lum bo‘ldi

Hech kimga sir emas, dunyoda shunday illatlar borki, inson sihat-salomatligiga zarb berib, uning hayotini xazonga aylantirib, yuborishi hech gap emas. Giyohvandlik balosi shunday shafqatsiz illatlar sirasiga kiradi. Giyohvandlikka mubtalo bo‘lgan kishining, avvalo, asab tizimi ishdan chiqadi, ruhiy va jismoniy salomatligiga jiddiy putur yetadi. Uning ijtimoiy faoliyati, ya’ni mehnat qobiliyati keskin buziladi.

Bu asr vabosiga shifokorlar ham kurashishi o‘rni alohida bo‘lsa-da, ayrim shifokorlar buni oldini olmasdan, aksiga targ‘ib qilish holatlari ham uchrab turmoqda.

Yaqinda ochiq sud majlisida giyohvandik vositasini saqlash va giyohvandlik vositalarini iste’mol qilishga o‘z ko‘rsdoshlarini jalb qilgan shifokorga nisbatan jinoyat ishi mazmunan ko‘rib chiqildi. Ish hujjatlariga ko‘ra, SH.Sheraliyev Furqat tuman tibbiyot birlashmasi shifokori lavozimida ishlab kelib, Furqat tumani hududida oqib o‘tuvchi zovurdan o‘sib turgan giyohvandlik vositasini terib olib, o‘z yonida saqlab kelgan.

Shu tariqasida SH.Sheraliyev kursdoshlarini yo‘qlab, 2021 yil 22 may kuni Sirdaryo viloyatining Guliston tumaniga mehmondorchilikka kelib, kursdoshlari bilan daryo bo‘yida o‘tirishadi, shu kuni soat 22:15 larda, Guliston tumani IIB xodimlari tomonidan o‘tkazilgan “Qoradori-2021” tadbiri davomida Guliston tumani, Oltin vodiy mahallasida joylashgan Guliston suv inshootlari va Do‘stlik kanali Boshqarmasi Do‘stlik-2 uchastkasi hududida 2020 yil iyul oyidan boshlab o‘zida saqlab kelgan mazkur giyohvand moddani iste’mol qilib, fuqarolar S.Abdullayev va A.Zokirovni iste’mol qilishga jalb qilganligi aniqlangan.

Guliston tuman IIB xodimlari tomonidan o‘tkazilgan tadbirda sudlanuvchi SH.Sheraliyev hamda S.Abdullayev va A.Zokirovlar o‘tirgan joydan oq rangli polietilen paketda giyohvand o‘simligiga o‘xshash modda, bir dona 0,5 litr hajmli “Niagara”, bir dona 0.5 litr hajmli “Montella”, hamda bir dona 0.45 litr hajmli “Tuborg” ichimliklari idishlari, bir dona baklashka yelim qopqog‘i, bir dona metal sanchqi, to‘rt dona falga qog‘ozi bo‘laklari tegishli hujjatlar asosida rasmiylashtirilib, ashyoviy dalil sifatida olingan.

Sudga oid kimyoviy ekspertizasining 2021 yil 27 may kunidagi №592-sonli xulosasida olingan o‘tkir hid taratuvchi o‘simlik moddasi tarkibida faol giyohvand modda tetragidrokannabinol mavjud bo‘lib, bu modda “Marixuana” deb atalishi va uning umumiy og‘irligi 4,32 grammga tengligi ko‘rsatilgan.

Sudga oid kimyoviy ekspertizasining 2021 yil 24 may kunidagi №146-sonli xulosasida, SH.Sheraliyevdan olingan lab, kaft surtmalari tekshiruvdan o‘tkazilganda, kannabinoidlar topilganligi ko‘rsatilgan.

Sudga oid kimyoviy ekspertizasining 2021 yil 24 may kunidagi №147-sonli xulosasida, S.Abdullayevdan olingan lab, kaft surtmalari tekshiruvdan o‘tkazilganda, kannabinoidlar topilganligi ko‘rsatilgan.

Sudga oid kimyoviy ekspertizasining 2021 yil 24 may kunidagi №148-sonli xulosasida, A.Zokirovdan olingan lab, kaft surtmalari tekshiruvdan o‘tkazilganda, kannabinoidlar topilganligi ko‘rsatilgan.

Sud, mazkur ishni ko‘rib chiqib, barcha holatlarni inobatga olib, to‘plangan dalillarga baho berib, SH.Sheraliyevga O‘zbekiston Respublikasi JKning 276-moddasi 1-qismi va 274-moddasi 2-qismi “v” bandi bilan JKning 59-moddasiga asosan 3 yil 6 oy muddatga ozodlikni cheklash jazosini tayinladi.

Xulosa qilib aytganida, SH.Sheraliyev noqonuniy qilmishi uchun nafaqat sudlandi, el orasida ham uyatga qoldi, uning qing‘ir ishlari yaxshilikka olib bormadi, axir buning o‘rniga o‘zi shu illat bilan kurashish lozim ediku.

Baxtiyor Mamadaminov,

Sirdaryo viloyat sudining jinoyat ishlari bo‘yicha sudyasi