Shahrisabzda navbatdagi yoshlar ekologiya va turizm xalqaro qurultoyi rasman ochildi!

9 avgust kuni Qashqadaryo viloyati Shahrisabz shahrida «Yoshlar - kelajak bunyodkorlari!» III ekologiya va turizm xalqaro qurultoyining tantanali ochilish marosimi bo‘lib o‘tdi.

Qadimiy va muhtasham Oqsaroyda bo‘lib o‘tgan tadbirni Ekologiya, atrof-muhitni muhofaza qilish va iqlim o‘zgarishi vaziri o‘rinbosari Iskandar Qutbiddinov va Qashqadaryo viloyati hokimi Murodjon Azimov ochib berdi.

Iskandar Qutbiddinov o‘z nutqida Davlatimiz rahbari boshchiligida yoshlarning orzu-intilishlari, qobiliyat va salohiyatini ro‘yobga chiqarish davlat siyosatining eng muhim va ustuvor yo‘nalishiga aylanganini alohida ta’kidladi. Shuningdek, yurtimizda ochilgan Markaziy Osiyo atrof-muhit va iqlim o‘zgarishini o‘rganish universiteti («Green University») ekologiya sohasiga befarq bo‘lmagan, tabiatga g‘amxo‘rlik qiladigan yoshlarga bu borada yetuk kadrga aylanish imkonini berishini qayd etdi.

«Bugungi qurultoy ham yoshlarning iqtidorini, salohiyatini yuzaga chiqarish, yangidan-yangi g‘oyalarni kashf qilish, yoshlarni ekologiya va turizm sohalari rivoji uchun birlashtirishga xizmat qiladi», - dedi Iskandar Qutbiddinov.

Qashqadaryo viloyati hokimi Murodjon Azimov so‘nggi yillarda yoshlarimiz uchun har bir sohada ko‘plab imkoniyatlar yaratib berilayotganini aytib o‘tdi.

Tadbir davomida o‘tgan yili saylangan «Yosh ekologlar» harakati hamda Yosh turizm elchilari taqdirlandi va samarali faoliyatlari uchun minnatdorlik bildirildi. Bu galgi qurultoyda yangi elchilar saylanadi.

Marosimda, shuningdek, qadimiy Keshda (hozirgi Shahrisabz) tug‘ilgan Sohibqiron Amir Temur siymosidagi tarixiy chiqishlar, konsert dasturi, ko‘rgazmali shoular namoyish etildi.

Ma’lumot uchun, qurultoyda yurtimizning barcha hududlaridan tashrif buyurgan jami 1000 nafardan ortiq yoshlardan iborat jamoalar ishtirok etmoqda. 13 avgustga qadar ekologiya va turizm sohalarda mutaxassislar ishtirokida o‘quv seminarlar, intellektual o‘yinlar, do‘stlik tadbirlari, «Eng yaxshi ekologik loyiha», «Eng yaxshi turizm loyihasi» va «Siz eko-qonunlarni bilasizmi?» tanlovlari, «Eko-turizm-kvest», «Yulduzlar tashrifi» va «Tug‘ilgan kun» loyihalari, yosh dizaynerlarning ko‘rgazmasi, «Open air» (ochiq osmon) formatida kinofilmlar namoyishi, «Chiqindisiz dunyo uchun» plogging aksiyasi, «Yoshlar spartakiadasi» ommaviy sport o‘yinlari hamda uning doirasida milliy va etnosport turlari bo‘yicha sport musobaqalari, yuqori natijalarga erishgan hamda yoshlarga o‘rnak ko‘rsatadigan sportchilar va murabbiylar ishtirokida «mahorat darsi», «Yosh ekologlar» harakati hamda Yosh turizm elchilari Kengashi a’zoligiga saylovlar, Shahrisabzdagi Oqsaroy me’moriy yodgorligi bo‘ylab sayohatlar bo‘lib o‘tadi.

Qurultoy yakunida faol ishtirok etgan guruhlar va hudud jamoalari vakillari diplom hamda esdalik sovg‘alari bilan taqdirlanadi. Shu bilan birga, qurultoy ishtirokchilarining har biriga Ekologiya, atrof-muhitni muhofaza qilish vazirligining maxsus sertifikati topshiriladi.