Ro‘molli o‘quvchilar ro‘yxati tuzilayotgani tasdiqlandi
Qo‘qondagi maktablarda ro‘mol o‘raydigan o‘quvchilarning ro‘yxati tuzilib, mahallalarga tarqatilayotgani haqidagi xabarlar tasdiqlangan.
Qo‘qon shahar hokimligi ijtimoiy tarmoqlarda chop etilgan Qo‘qon shahridagi ro‘mol o‘raydigan maktab o‘quvchilarining ro‘yxatlari haqidagi xabarlarga izoh bergan.
Izohga ko‘ra, bunday ro‘yxatlar yoshlarning qiziqishlaridan kelib chiqib iqtidorlarini to‘g‘ri yo‘naltirish maqsadida shakllantiriladi.
Dinga, ro‘mol o‘rashga qiziqadigan o‘quvchilar ro‘yxatini tuzishdan maqsad esa "ular o‘rtasida ekstremistik g‘oyalar tomir otishining oldini olish, muqaddas dinimizning asl mohiyatini tushuntirish, yoshlarning bilim olishga qiziqishlarini oshirish"dir.
"Ushbu ro‘yxatlarning mahalla fuqarolari yig‘inlariga taqdim etilishi ta’lim-tarbiya ishlariga yoshlarning ota-onalarini ham jalb qilishni nazarda tutadi va mahalla raislarining yoshlar hamda diniy-ma’rifiy masalalar bo‘yicha o‘rinbosarlarining vazifasiga kiradi", deyiladi xabarda.
Qo‘qon hokimligiga ko‘ra, bu ro‘yxatlar hech qanday salbiy ma’noga ega emas. Yoshlarning turli ro‘yxatlarga kiritilishidan xavotirga o‘rin yo‘qligi aytilgan.
