“Rospotrebnadzor” tomonidan zamonaviy monitoring mobil laboratoriyasi topshirildi

Sog‘liqni saqlash vazirligida Rossiya Federasiyasining Iste’molchilar huquqlarini himoya qilish va inson farovonligini nazorat qilish federal xizmati (Rospotrebnadzor) rahbari — bosh davlat sanitariya shifokori Anna Popova boshchiligidagi delegasiya qabul qilindi.

Bugungi kunda SSV huzuridagi Sanitariya-epidemiologik osoyishtalik va jamoat salomatligi qo‘mitasi va “Rospotrebnadzor” o‘rtasida yaqin hamkorlik yo‘lga qo‘yilgan.

Uchrashuvda vazir v.b. Asilbek Xudayarov COVID-19 pandemiyasi yuqumli kasalliklarga qarshi kurashish muhim ekanligini ko‘rsatgani, shu bois uning oldini olish bo‘yicha hamkorlikda faoliyat olib borish lozimligini aytib o‘tdi.

Shuningdek, 2021 yilda ikki davlat o‘rtasida sanitariya-epidemiologik osoyishtalikni ta’minlash borasida hamkorlik dasturini amalga oshirish bo‘yicha “Yo‘l haritasi” imzolangan.

“Rospotrebnadzor” rahbari Anna Popova ta’kidlaganidek, ikki davlat o‘rtasida aholining sanitariya-epidemilogiya osoyishtaligini ta’minlash, o‘ta xavfli yuqumli kasalliklarni oldini olish borasida hozirda 5 ta qo‘shma loyiha amalga oshirilayotgan bo‘lib, kelgusida ushbu hamkorlikni yanada kengaytirish sohani takomillashtirishga xizmat qiladi.

Uchrashuv davomida “Rospotrebnadzor” tomonidan III avlod indikator va monitoring mobil laboratoriyasi taqdim etildi. Ushbu zamonaviy laboratoriya bakterial va virusli o‘ta xavfli yuqumli kasalliklarga qarshi tezkor choralar ko‘rish, epidemiologik tekshiruvni amalga oshirish, jumladan, biologik material yoki bevosita infeksiya o‘chog‘idagi atrof-muhit ob’ektlarining o‘ziga xos ko‘rsatkichlarini yig‘ish hamda namunalar olishga mo‘ljallangan.

Laboratoriyadan favqulodda vaziyatlarda yuqumli kasalliklarning tabiiy o‘choqlariga kirib borib, epidemiologik va epizootologik monitoring o‘tkazishda foydalanish mumkin. Unda diagnostik tadqiqotlar PZR, Immunoferment tahlili (IFA), Immunoxromatografik tahlil (IXA), fluorestik antitanalar usuli (MFA) yordamida amalga oshiriladi.

Zamonaviy avtolaboratoriya biologik xavfsizlikni ta’minlash vositalari, xususan, havo to‘lqinini nazorat qiluvchi tizim, III avlod mikrobiologik xavfsizlik va PZR bokslari, shaxsiy himoya vositalarini yechish uchun izolyasiya qilingan xona, masofadan turib boshqariluvchi ultrabinafsha dezinfeksiya tizimi, materialning laboratoriyaga kiritilishi uchun shlyuz-kamerasi bilan jihozlangan.

Tomonlar mazkur mobil laboratoriyada faoliyat ko‘rsatadigan, sanitariya-epidemiologiya sohasidagi favqulodda vaziyatlarda tezkor ishga kirisha oladigan mutaxassislarni yaqin kelajakda o‘qitish va malakasini oshirish bo‘yicha ham kelishib oldi.

A. Xudayarov ta’kidlaganidek, bundan avval ham ikki davlat hududida yuqumli kasalliklarga qarshi kurashish bo‘yicha hamkorlik dasturini amalga oshirish doirasida 4 ta mobil mikrobiologik ekspress-diagnostika laboratoriyalari taqdim etilgan bo‘lib, ular Qoraqalpog‘iston Respublikasi, Buxoro va Surxondaryo viloyatlari hamda Orol dengizining qurib borayotgan hududlarida o‘ta xavfli infeksiyalar o‘choqlarining shakllanish xususiyatlarini birgalikda o‘rganishda qo‘l kelmoqda.

Shuningdek, Rossiya tomonidan tog‘li, chekka hududlarda tibbiy yordam ko‘rsatuvchi 2 ta zamonaviy jihozlangan ko‘chma diagnostika majmuasi ajratilgan bo‘lib, hozirda ulardan shunday joylarda yashovchi aholida OIV, virusli gepatit, sifilis va boshqalarga bepul tarzda tahlil olish uchun mobil punkt sifatida foydalanilmoqda.

Uchrashuvda tomonlar mikroblarga qarshi preparatlarga chidamlilikni oldini olish dasturini amalga oshirish, OIV infeksiyasiga qarshi kurashish, bu borada laboratoriya tahlillari bilan bog‘liq masalalarni birgalikda o‘rganish kabi qator masalalar yuzasidan o‘zaro hamkorlikni kengaytirish bo‘yicha ham o‘zaro fikr almashdi.

Sog‘liqni saqlash vazirligi
Matbuot xizmati.