Rejissyor Sarvar Karimov: "Tepa"dagilar ko‘rmi, karmi, bilmadim... Ko‘pchilik vrachlar ishga chiqmay qo‘yishgan"

O‘zbekistonlik kinorejissyor Sarvar Karimov 17 iyul kuni otasi koronavirusdan vafot etgani va tibbiyot sohasini qattiq tanqid qilgani, shundan so‘ng u koronavirusga chalingan oilasi bilan Nuroniy sanatoriysida davolanish uchun yotqizilgani haqida xabar berilgan edi. U 18 iyul kuni o‘z sahifasida sihatgohdagi vaziyat haqida yozib qoldirdi. Bu haqda "Daryo" yozmoqda.

Sarvar Karimov mazkur tvitida shifokorlar holdan toygani va butun shifoxonada atigi 3-4 kishi borligi haqida yozgan. «Kattakon»larga esa shifokorlarni asrashni maslahat bergan.

«Menga hamdardlik bildirgan va sabr tilagan barchaga rahmat. Hozir Nuroniy sanatoriysida davolanyapmiz. Vrachlar juda kam, butun shifoxonaga atigi 3-4 kishi. Qo‘ldan kelgancha yordam berishyapti, ammo ularga ham qiyin. Charchab, adoyi tamom bo‘lgan hammasi. Shifokorlarni asrang, kattakonlar», — deb yozadi Sarvar Karimov.

Tviti davomida kinorejissyor shifokorlarga va’da qilingan pullar berilmaganini ta’kidlab o‘tgan. Sarvar Karimov ularga sabr tilab, minnatdorchiligini bildirgan.

«Va’da qilingan millionlar berildimi, opa, desam indamay pastga qarab qo‘yishdi... Ko‘pchilik vrachlar ishga chiqmay qo‘yishgan, ishlayotganlarga faqat sabr tilash mumkin. O‘z hayotini xavf ostiga qo‘yib, yana hamma bemorlarning ta’nasini eshitib, tishni tishga qo‘yib ishlashyapti. Baraka topishsin», — deydi u.

Shuningdek, kinorejissyor «tepadagilar»ni tanqid qilib, yarim yil davomida ushbu holatga tayyorgarlik ko‘rilmaganidan hayron ekanini bildirgan.

«Yaxshiyam dabdurustdan yer qimirlamadi, osmondan kometa tushmadi. Yarim yildan buyon butun dunyo ko‘rib turibdi nimalar bo‘layotganini. ‘Tepa’dagilar ko‘rmi, karmi, bilmadim... Shuncha payt tayyorgarlik ko‘rish o‘rniga nima qilishdi ekan, hayronman. Xudodan ularga insof so‘raylik, yaxshilar», — deb fikrlarini tugatgan kinorejissyor.