Farg‘onada O‘zbekiston, Qirg‘iziston va Tojikiston maxsus xizmatlari rahbarlari chegara masalasi bo‘yicha uchrashdi

Farg‘ona shahrida O‘zbekiston Davlat xavfsizlik xizmati raisi Abdusalom Azizov, Qirg‘iziston vazirlar mahkamasi raisining o‘rinbosari – Milliy xavfsizlik davlat qo‘mitasi raisi Qamchibek Tashiyev, Tojikiston Milliy xavfsizlik davlat qo‘mitasi raisi Soymo‘min Yatimov o‘rtasida uchrashuv bo‘lib o‘tdi.

Muzokaralar chog‘ida tomonlar ochiq va maxfiy tarzda mintaqaviy xavfsizlikni ta’minlashga oid barcha muammolar to‘plamini atroflicha muhokama qildilar. Terrorizm, ekstremizm, narkotik moddalarning noqonuniy aylanishi, noqonuniy migrasiya, kontrabanda va transchegaraviy xarakterdagi boshqa tahdid va tahdidlarga qarshi kurashish kabi dolzarb sohalardagi hamkorlikning holati va istiqbollari yuzasidan fikr almashildi. Tomonlar davlatlari o‘rtasida chegaradosh hamkorlik va umuman olganda, yaxshi qo‘shnichilik munosabatlarini rivojlantirish uchun qulay shart-sharoitlar yaratish masalalariga to‘xtalib o‘tildi.

Muloqot chog‘ida Qirg‘iziston Respublikasi va Tojikiston Respublikasi o‘rtasidagi davlat chegaralarini delimitasiya qilish bilan bog‘liq kun tartibidagi masalalar, shuningdek, O‘zbekiston Respublikasi va Qirg‘iziston Respublikasi o‘rtasidagi chegaralarni demarkasiya qilish masalalari konstruktiv tarzda ko‘rib chiqildi.

Uchrashuv ishtirokchilari qirg‘iz-tojik chegaralarini delimitasiya qilish va o‘zbek-qirg‘iz davlat chegaralarini demarkasiya qilish jarayonlarini jadallashtirish bo‘yicha kelishuvlarga erishdi va tomonlarning o‘zaro manfaatlarini hisobga olgan holda ushbu masalalarni hal etish bo‘yicha amaliy chora-tadbirlar belgilab oldi.

Muzokaralar yakunida Qirg‘iziston-Tojikiston hukumatlararo komissiyasi a’zolariga chegaraning qolgan uchastkalarini muvofiqlashtirish, shuningdek, tegishli ikki tomonlama shartnomani tayyorlash va imzolash bo‘yicha aniq topshiriqlar berildi.