Pentagon rahbari Qo‘shma Shtatlar Isroilga qurol-yarog‘larning ayrim turlarini yetkazib berishni to‘xtatganini tasdiqladi
AQSh Mudofaa vaziri Lloyd Ostin Isroilning Rafahga keng qamrovli quruqlik hujumi kontekstida AQSh yaqinda bu mamlakatga yuboriladigan qurollarni baholash jarayonida ekanligini tasdiqladi. Uning so‘zlariga ko‘ra, Qo‘shma Shtatlar ushbu jarayon davomida ayrim turdagi qurollarni yetkazib berishni to‘xtatgan.
Senatdagi byudjet muhokamasida Mudofaa vaziri Ostin Rafahdagi so‘nggi vaziyat va AQSh Isroilga ayrim qurol-yarog‘ yetkazib berishni to‘xtatgani haqidagi xabarga izoh berdi.
Vazir, Isroilning Rafahga murakkab quruqlik hujumi uyushtirishini istamasliklarini va bu boradagi aniq xabarlarini Tel-Avivdagi suhbatdoshlariga yetkazganliklarini bildirdi. Bayden ma’muriyati mintaqadagi o‘zgarishlarni diqqat bilan kuzatib bormoqda.
Ostin davom etdi, «Biz Isroilning o‘zini himoya qilish vositalariga ega bo‘lishini ta’minlashda davom etamiz. Biroq, biz hozirda Rafahdagi o‘zgarishlar kontekstida yaqin kelajakda (Isroilga) yuboriladigan xavfsizlikni qo‘llab-quvvatlash yukini baholayapmiz. Mavjud vaziyatni baholab, katta miqdorda o‘q-dorilar bo‘lgan yukni to‘xtatdik».
Shahardagi 1,5 milliondan ortiq Falastin fuqarosi uchun vaziyat juda og‘ir ekanini ta’kidlagan Ostin, «Rafahda katta to‘qnashuv bo‘lishini albatta istamaymiz» dedi.
Isroilga qo‘shimcha qurol uzatilishining davom etishini baholash jarayoni davom etayotganini bildirgan Ostin, «Bu masala bo‘yicha yakuniy qarorga kelganimiz yo‘q» deb qo‘shimcha qildi.
AQSh ommaviy axborot vositalarining nomi oshkor etilmagan AQSh rasmiylariga asoslanib xabar berishicha, Qo‘shma Shtatlar Isroilga ba’zi qurol yetkazib berishni vaqtincha to‘xtatgan va bu jarayon Rafahdagi voqealar rivoji sifatida baholanmoqda.
