Organizm ichki yog‘i nimasi bilan xavfli va uni qanday kamaytirish mumkin?
📄 Qorin bo‘shlig‘idagi ichki organlar, masalan, jigar, oshqozon osti bezi va ichaklar atrofida to‘planadigan yog‘larning bir turi visseral (ichki) yog‘ deb ataladi. U teri osti yog‘idan farq qiladi va salomatlik uchun zararlidir.
🔷 Bunday yog‘ qandli diabetning 2-turi, yurak-qon tomir kasalliklari, insult va saratonning ba’zi turlari kabi xastaliklarga chalinish xavfini oshiradi. Shuningdek, visseral yog‘ metabolik faol, ya’ni gormonal fonga va moddalar almashinuviga ta’sir qiladi.
Visseral yog‘ning to‘planishiga xizmat qiluvchi omillar quyidagilar:
✔️noto‘g‘ri ovqatlanish (shakar va to‘yingan yog‘larni haddan tashqari ko‘p iste’mol qilish);
✔️jismoniy faollikning kamligi;
✔️kortizol darajasining oshishiga olib keluvchi stress holatlari;
✔️genetik moyillik;
✔️yoshning oshishi, chunki yillar davomida metabolizm sustlashadi.
❓Visseral yog‘ miqdorini kamaytirish uchun nimalar qilish kerak?
🏃🏻♀️Buning uchun avvalambor jismoniy faollik zarur. Yugurish, piyoda yurish, suzish, velosipedda uchish kabi muntazam aerobik mashqlar kaloriyalarni yoqish va ichki organlardagi yog‘ni kamaytirishga yordam beradi. Buning uchun haftada kamida 150 daqiqa o‘rtacha jismoniy mashqlar tavsiya etiladi. Shuningdek, og‘irlik ko‘tarish kabi mashg‘ulotlar mushaklar massasini oshirib, metabolizmni tezlashtiradi.
🥘 Ikkinchi o‘rinda esa muvozanatli ovqatlanish zarur. Bunda organizm uchun kerak bo‘lgan barcha oziq moddalarni ta’minlaydigan turli xil taomlarni iste’mol qilish tavsiya etiladi. Rasionning asosini sabzavot, mevalar, don mahsulotlari, yog‘siz go‘sht, baliq, dukkaklilar va turli yong‘oqlar tashkil qilishi kerak.
🍭Shakar va rafinatlangan uglevodlar iste’molini cheklagan ma’qul. Shirinliklar, oq non, makaron va shirin ichimliklardan tiyiling.
🥣 Zaytun yog‘i, yong‘oq va yog‘li baliqlardan olingan sog‘lom yog‘larni rasionga kiritish maqsadga muvofiq. Trans yog‘lardan saqlaning va to‘yingan yog‘larni iste’mol qilishni cheklang.
🧘🏻Navbatdagi tavsiya stressni boshqarish bo‘lib, buning uchun meditasiya, chuqur nafas olish, yoga yoki boshqa dam olish usullarini mashq qilish foydadan xoli emas. Yetarli vaqt (sutkasiga 7-9 soat) va sog‘lom uyqu ham juda muhim. Sababi uyquga to‘ymaslik ham visseral yog‘ning ortishiga yo‘l ochadi. Shuning uchun kuningizni shunday tashkil qilingki, dam olish va tiklanish uchun vaqt yetarli bo‘lsin.
🧑🏻⚕️ Bundan tashqari, visseral yog‘ darajasini va umumiy sog‘lig‘ingizni kuzatib borish uchun muntazam ravishda tibbiy ko‘rikdan o‘tib turing.
✅ Hayot tarziga o‘zgarishlar kiritish va sog‘lom turmush tarzini yuritish albatta o‘z natijasini beradi. Asosiysi, umumiy salomatlik holatini yaxshilash va surunkali kasalliklarning rivojlanish xavfini kamaytirishga erishish mumkin. (https://telegra.ph/file/9bbfd23eb8aed1f1c4382.jpg)
