O‘zLiDeP: Yangi O‘zbekiston – yangicha boshqaruv

Partiya uchun yangi O‘zbekiston – shaxs, biznes va xususiy sektorning huquqlari, erkinliklari va qonuniy manfaatlarini himoya qiladigan professional parlament faoliyat ko‘rsatayotgan va “Inson davlat uchun emas, davlat inson uchun” tamoyili amal qilayotgan mamlakatdir.

Parlamentarizmni har tomonlama rivojlantirish va mustahkamlash, siyosiy partiyalarning rolini oshirish, xalq hokimiyatini yanada kuchaytirish bu boradagi partiyaning ustuvor vazifalaridan biri hisoblanadi. O‘zLiDeP parlament saylovlarida g‘alaba qozongan partiya nafaqat Bosh vazir nomzodini, balki parlament quyi palatasi Spikeri nomzodi, Hukumat tarkibini taklif etishi, saylovlarning proporsional tizimiga o‘tish, hokimiyat organlarining hisobdorligini va ochiqligini ta’minlash maqsadida jamoat va parlament nazorati to‘g‘risidagi qonunlarni zamon talablaridan kelib chiqib takomillashtirish, qonun ijodkorligi borasidagi faoliyat sifatini tubdan oshirish, qonunchilik bazasini tizimlashtirish va qonunosti hujjatlari sonini keskin qisqartirish, qonun ijodkorligida “aqlli tartibga solish” modeli elementlarini qo‘llash, “qonunning yagona manbai va muallifi xalq ekan, qonunlar inson va jamiyat hayotini yaxshilash, erkinlashtirish uchun qabul qilinadi”, degan olijanob g‘oyani hayotga joriy etish kabi g‘oyalarni ilgari surmoqda.

Partiya bu borada bizga to‘g‘ridan-to‘g‘ri, bevosita ishlaydigan qonunlar kerak va qonunosti hujjatlari bilan umummajburiy normalar belgilashni to‘xtatish zarur, degan qat’iy pozisiyani yoqlaydi.  Shuning uchun partiya normativ-huquqiy hujjatlarni qabul qilish jarayonida keng jamoatchilikning ishtirokini ta’minlash hamda jamoat tashkilotlarining bu boradagi huquq va majburiyatlarini aniq belgilab qo‘yish maqsadida “Normativ-huquqiy hujjatlarning jamoat muhokamasini tashkillashtirish to‘g‘risida”gi qonunni qabul qilishni taklif etmoqda.

Bundan tashqari partiya xalq deputatlari kengashlari faoliyatini takomillashtirish, ularning vakolatlarini kengaytirish, eng muhimi, mazkur tuzilmalarning hududlarni ijtimoiy-iqtisodiy rivojlantirish, real daromadlarning barqaror o‘sishi, turmush darajasi va sifatini oshirish, mahalliy byudjetni shakllantirish hamda nazorat qilish bo‘yicha mas’uliyatini kuchaytirish. Biz xalq vakillik organlarining fuqarolar uchun ochiqligini ta’minlash, “Elektron parlament” va “Elektron xalq deputatlari kengashi” kabi konsepsiyalarni hayotga izchil tatbiq etish tarafdoridir.

Partiya dunyoning davlat boshqaruvi sifati yuqori darajaga ega, axborot-kommunikasiya texnologiyalari keng joriy etilgan 30 ta davlati qatoriga O‘zbekistonning kirishiga erishishni o‘z oldiga maqsad qilib qo‘ygan. Davlat xizmati  bu – fuqarolarning professional xizmat faoliyati, unda o‘z kasbining ustalari ishlashi shart, degan pozisiyamizda qattiq turamiz.  Bu – davlat boshqaruvi tizimining samarali va sifatli faoliyat yuritishi, jamiyatning barqaror rivojlanishini ta’minlash garovidir!

Ayni paytda bu borada anchagina kamchilik va nuqsonlarimiz mavjudligi hammaga ayon, ayrim davlat hokimiyati vakillarining u yoki bu masaladagi “qovun tushirish” holatlari haqida ko‘p va xo‘p gapirildi, bu vaziyat OAV va ijtimoiy tarmoqlarda keng va qizg‘in muhokamalarga sabab bo‘ldi. Shuning uchun partiyamiz menejmentning zamonaviy usullarini va korporativ boshqaruv tamoyillarini joriy etish, autsorsing dasturlarini amalga oshirish, davlat xizmatiga zamonaviy fikrlaydigan, yangicha tafakkurga ega, boshqaruvning innovasion, yanada moslashuvchan modellarini, jumladan, loyiha modelini (Agile, Scrum, Kanban, PRINCE2 va boshqalar) ishlab chiqish va joriy etishga layoqatli yetuk mutaxassislar, siyosiy partiyalar, xususiy sektor vakillarini, kuchli xorijiy ekspertlarni jalb qilishni ko‘zda tutuvchi yangi kadrlar siyosatini amalga oshirish,  ma’muriy islohotlar konsepsiyasi qoidalarining to‘liq va samarali amalga oshirilishi, hukumat, davlat institutlari hamda joylardagi ijro hokimiyati organlari faoliyatining barqarorligi va samaradorligi, davlat xizmatlarining sifati va tezkorligini ta’minlash, barcha davlat xizmatlarini BPR (Business process reengineering – biznes jarayonini qayta tashkil etish) tizimi asosida soddalashtirish, davlat xizmatlarini ko‘rsatishga zamonaviy axborot tizimlarini keng joriy etish, “bir oyna” tamoyili asosida ko‘rsatiladigan davlat xizmatlarini kengaytirish, O‘zbekistonning izchil innovasion va texnologik rivojlanishini ta’minlash maqsadida ushbu sohaning boshqaruv tizimini takomillashtirish g‘oyalarini ilgari suradi.  Partiya davlat va xo‘jalik boshqaruvi organlari faoliyatini tadbirkorlikni qo‘llab-quvvatlash, investisiyalarni jalb etish, byudjet mablag‘lari tasarruf qilinishining shaffofligi, davlat mulkidan foydalanishning samaradorligi va maqsadliligi kabi muhim ko‘rsatkichlar asosida baholaydi.

Partiya hozirgi axborot jamiyati shakllanishi sharoitida, axborot va bilimlar taraqqiyotning strategik omiliga aylangan bir davrda mamlakat rivojlanishi va uning raqobatbardoshligini ta’minlash zamonaviy axborot-kommunikasiya va “raqamli” texnologiyalar jamiyat va davlat hayotining barcha jabhalariga qanchalik joriy etilgani bilan bog‘liq deb biladi.

Xabaringiz bor, ayni paytda Toshkent shahar Mirzo Ulug‘bek tumanidagi Dasturiy mahsulotlar va axborot texnologiyalari texnologik parkida  axborot texnologiyalari, moliya texnologiyalari, logistika, elektron tijorat, elektron ta’lim, biotexnologiya va boshqa yo‘nalishlardagi ilk loyihalar muvaffaqiyatli amalga oshirilmoqda. Masalan, AQShdagi transport korxonalariga logistika hamda kafe va pisseriyalarga autsorsing bo‘yicha texnologik xizmat ko‘rsatish yo‘lga qo‘yilgan. Texnoparkning bu kabi xizmatlari arzonligi, sifati qolishmasligi bilan xorijliklarga ma’qul bo‘lmoqda. Soha rivojiga yanada keng sharoit yaratish maqsadida bu yerda yana yettita lotda qurilish qilinib, IT-ofislar, biznes markazi, mehmonxona va boshqa binolar barpo etish rejalashtirilgan. Texnoparkda yillik ishlab chiqarish quvvati 2020 yilda 10 million dollardan ortishi, 2025 yilda esa 100 million dollarga yetishi ko‘zda tutilgan. Umuman olganda yurtimizda kelgusi 5 yil ichida dasturiy mahsulotlar eksportini 10 barobarga oshirish, mamlakatimiz yalpi ichki mahsulotidagi axborot texnologiyalari sektorining ulushini kamida 4 foizga ko‘tarish rejalashtirilgan. Bundan tashqari, «Big data», ya’ni katta hajmli ma’lumotlarga ishlov berish va «narsalar interneti», aqlli videokuzatuvlar va jamoat joylarida monitoring tizimini joriy etishni o‘z ichiga olgan «aqlli» va «xavfsiz» shaharlar texnologiyalarini joriy etish bo‘yicha bir qator loyihalarni amalga oshirish davom ettirilmoqda.  Xususan shu yilning oktyabr oyida O‘zbekistondagi ilk aqlli mehmonxonalar Tashkent Cityda joylashgan yangi Kongress-xoll va Hilton mehmonxonasi ish boshladi. Ushbu zamonaviy binolarda boshqarishning turli vositalarini – kirish/chiqish, isitish va ventilyasiya tizimlarini birlashtiruvchi to‘liq integrasiyalashgan, kiberxavfsiz, bulutli boshqarish tizimi (BMS) o‘rnatilgan. «Xavfsiz shahar» loyihasi doirasida butun respublika bo‘ylab yo‘l harakati qoidalari buzilishi holatlarini videoqayd etish, turar-joy binolari va ijtimoiy ahamiyatga ega ob’ektlarning xavfsizligini monitoring qilish, avtoturargohlar va to‘xtash joylarini tartibga solish kabi ishlar olib borilmoqda. Yaqinda esa O‘zbekiston va BAA ixtisoslashtirilgan onlayn portal orqali aholiga bepul masofaviy ta’lim olish imkoniyatini beruvchi «Bir million o‘zbek dasturchisi» (One Million Uzbek Coders) loyihasini ishga tushirib yuborishdi. Dasturning asosiy maqsadi – raqamli texnologiyalar bo‘yicha mutaxassislar avlodini tayyorlash va dasturlash bo‘yicha ularga kerakli bilim va ko‘nikmalarni berishdir.

Shuning uchun partiya ushbu yo‘nalishda “Raqamli O‘zbekiston 2030” dasturini joriy etish, “katta ma’lumotlar” (“Big data”), “blokcheyn”, “aqlli”, “xavfsiz” shahar, “internet buyumlar” texnologiyalarini keng joriy qilish, telekommunikasiya infratuzilmasini yanada rivojlantirish, ushbu asosda mamlakat YAIMning 30 foizga o‘sishi hamda yurtimizning “raqamli iqtisodiyotga tayyorlik” va “AKT rivojlanishi” xalqaro indekslari bo‘yicha ilg‘or davlatlar qatoriga kirishini ta’minlash, mamlakatdagi barcha aholi punktlari va ta’lim muassasalariga zamonaviy optik tolali internet aloqa tizimini olib kirish va internet xizmatlari narxini pasaytirish, tashqi internet kanallari orqali internet trafiklari sotib olish va mamlakatga tarqatish bo‘yicha monopollashuvga yo‘l qo‘ymaslik, aholi, tadbirkorlik sub’ektlari va davlat organlari o‘rtasida o‘zaro samarali muloqotni shakllantirish, ortiqcha sansalorlik va byurokratizmning oldini olishga qaratilgan “Elektron hukumat” konsepsiyasini izchil amalga oshirish,  davlat organlari va boshqa tashkilotlar faoliyatining axborot resurslari va texnologiyalarini yanada taraqqiy ettirish, sohada davlat-xususiy sherikchilik mexanizmini rivojlantirish, xususan, davlat kadastri ishlarini yuritishning to‘liq raqamlashtirilishini ta’minlash va mulkni ro‘yxatdan o‘tkazish tartib-taomilini soddalashtirish kabi bir qator kompleks chora-tadbirlarni amalga oshirishni  taklif etmoqda.