Namanganda fuqaro o‘z qarindoshini qasddan o‘ldirdi
To‘raqo‘rg‘on tumanining «Sohibkor» mahallasida yashovchi Ismat Alinazarov (ism-shariflar o‘zgartirilgan) yoshligidan anchayin manman, kalondimog‘ bo‘lib ulg‘aydi. U o‘tgan yilning avgust oyi oxirlarida uyiga mehmon bo‘lib kelgan tog‘asiga qo‘l ko‘tardi.
Ismatning bu qilig‘i qarindosh-urug‘larini qattiq ranjitdi. Ko‘pchilikning undan ko‘ngli qoldi. Aynan ana shu voqea sabab u 2021 yil 5 sentyabr kuni yana bir qarindoshi Botir Abdulhamidov bilan ham janjallashib qoldi.
Afsuski, bu janjalning oxiri fojiali yakun topdi.
Voqea tafsilotiga to‘xtaladigan bo‘lsak, o‘sha kuni I. Alinazarov do‘konga borganida Botir unga kinoyali so‘z qotadi:
— Tog‘asini urgan «polvon», ishlar qalay?
Tabiiyki, bu gap Ismatga yoqmaydi. Pirovardida ikkalasi mushtlashib ketishadi. Lekin atrofdagilar ularni ajratib qo‘yishadi. Botir u bilan janjallashmaslik maqsadida uyiga kirib ketadi. Biroq I. Alinazarov uni telefon orqali haqorat qilib, so‘kishda davom etadi. Qolaversa, o‘rtadagi ziddiyatga oydinlik kiritish maqsadida qarindoshini tumanning «Olchin» mahallasi markaziga chaqirtirib, bir necha marotaba qo‘ng‘iroq qiladi. Javob bo‘lmagach, SMS xabarlar yuboradi. Ammo B. Abdulhamidov keyinchalik telefon apparatini o‘chirib qo‘yadi. Bu esa zo‘ravon yigitga juda alam qiladi. Natijada u g‘azablanib, Botirning akasi Bahrom Abdulhamidovga telefon qiladi. Ular o‘zaro bahslashib, orani ochiq qilish uchun tumanning janubiy chegarasidan oqib o‘tuvchi Sirdaryo daryosi bo‘yida uchrashishga kelishadi.
Ertasi kuni Ismat uyidan chiqib ketayotgan vaqtida ukasi Javohir Alinazarov kechqurun bo‘lib o‘tgan voqea tafsilotini so‘raydi.
— Mayli, o‘tgan ishga salovat. Siz bormang, Bahrom aka va Botir bilan o‘zim gaplashaman, — deydi Javohir.
Shuning uchun akasini uyda qoldirib, o‘zi Bahromning uyi tomon yo‘l oladi.
Manzilga yaqinlashganda Bahrom tog‘asi Azamat Akromaliyev bilan ko‘chada turganiga ko‘zi tushadi. J. Alinazarovga tog‘a-jiyan go‘yoki akasi Ismatni so‘roq-savol qilish uchun yig‘ilishgandek tuyuladi. Shu bois u akasiga qo‘ng‘iroq qilib, bu haqda xabar beradi. So‘ngra Bahrom va Azamatning yoniga boradi. Shu payt B. Abdulhamidov bor kuchi bilan J. Alinazarovning yuziga musht tushiradi. Oqibatda u hushini yo‘qotib, yerga yiqiladi.
Ukasining qo‘ng‘irog‘idan keyin g‘azab otiga mingan I. Alinazarov oshxonada turgan o‘tkir pichoqni olib, kirakash mashinada Bahrom Abdulhamidovning oldiga jo‘naydi.
Ismat yetib kelgach, ukasi Javohirning yerda qimirlamay yotganini ko‘rib, «Ukamni o‘ldirib qo‘yibdi» degan fikrga boradi. Shu bois mashinadan tusha solib, kurakda turmaydigan so‘zlar bilan so‘kingancha Bahromga tashlanadi va yonidagi pichoqni olib, uning ko‘krak qafasi va o‘ng yelka qismiga zarb bilan sanchadi. Og‘ir jarohat olgan B. Abdulhamidov voqea joyida vafot etadi. Pirovardida qotil shu kuniyoq qo‘lga olinib, unga nisbatan jinoyat ishi qo‘zg‘atildi. Tergov jarayonida Ismatning xonadonidan sof vazni 3,22 grammga teng «Marixuana» giyohvandlik moddasi ham topiladi.
Shundan so‘ng har ikki jinoyat ishi jinoyat ishlari bo‘yicha To‘raqo‘rg‘on tumani sudida ko‘rib chiqildi. Sud I. Alinazarovni Jinoyat kodeksining 97 (qasddan odam o‘ldirish) va 276-modda (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlamay qonunga xilof ravishda tayyorlash, egallash, saqlash va boshqa harakatlar) lari 1-qismiga asosan aybdor deb topib, uzoq muddatga ozodlikdan mahrum etish jazosi tayinladi.
Xulosa o‘rnida aytish mumkinki, manmanlik va o‘jarlik kabi illatlar hamisha insonga pand berib, ayanchli qismatlarga giriftor etib kelgan.
Jahli chiqqanda o‘zini bosolmaslik esa, bundan ham xavfliroqdir. Shu bois oila, mahalla va butun jamiyatimizda ana shunday illatlarga qarshi qat’iy kurashish zarur. Yuz bergan qotillik barchani hushyor torttirishi, hamisha ogoh bo‘lishga undaydi. Zero, jinoyatchilikning oldini olishga barcha birdek mas’uldir.
Otabek SIDDIQOV,
jinoyat ishlari bo‘yicha
To‘raqo‘rg‘on tumani sudi raisi