Mudofaa vaziri o‘rinbosari Ikkinchi jahon urushi qatnashchisining holidan xabar oldi

Kecha, 3 mart kuni O‘zbekiston mudofaa vazirining tarbiyaviy va mafkuraviy ishlar bo‘yicha o‘rinbosari polkovnik Hamdam Qarshiyev Shimoli-g‘arbiy harbiy okrugiga xizmat safari davomida Nukus shahrida istiqomat qilayotgan Ikkinchi jahon urushi qatnashchisi Nazarboy ota Tojiboyev xonadonida mehmon bo‘lib, nuroniy holidan xabar oldi.

Nazarboy otadan oldin urushga uning katta akasi Saparniyoz boradi. Nazarboy otaning dadasi Ismoil Tojiboyev ham Ikkinchi jahon urushida janggohlarda fashizmga qarshi fidoyilarcha kurashadi. Ammo g‘alaba kunigacha yetib kelmaydi. 1944 yilda, uyga qaytish chog‘ida Ismoil ota Orol dengizi orqali kelayotgan kemada jon beradi. Yaqin qarindoshlari bilan oxirgi marta ko‘rishishi uchun unga atigi bir necha soat vaqt yetmaydi...

1942 yilning 22 iyun kuni Nazarboy otaning o‘zi frontga otlanadi. U quruqlikdagi qo‘shinlar polki tarkibida Rjev tagidagi Bryanshinadagi janglarda dushman bilan mardonavor kurashadi. Otaxon janglarda bir necha bor yaralanadi, ammo uyiga eson-omon qaytadi.

Otaxon urushdan qaytgach, 1951 yilda Nukus pedagogiga institutining rus tili va adabiyoti fakultetida tahsil ola boshladi. 1956 yildan 1992 yilgacha “Qoraqalpog‘iston” va “Bilim” nashriyotlarida faoliyat olib bordi. Shu davr ichida turmush o‘rtog‘i Bazar aya Saimbetova bilan 10 nafar bolani el koriga yaraydigan insonlar etib tarbiyalashdi.

Mamlakatimizda obro‘-e’tibor topgan Nazarboy ota Qoraqalpog‘istonning nashriyotlaridagi 40 yillik mehnat faoliyati davomida 250 dan ortiq kitob, tarjima va tahrirlar qilgan. O‘z hayotini ilm-fan va ma’rifatga bag‘ishlagan ustoz urush yillaridagi xotiralarini ham ko‘plab bosma nashrlarda chop etgan. Nazarboy otaning urush yillarida ko‘rsatgan qahramonligi bugun ham gazeta va jurnallarda turli maqolalar orqali o‘sib kelayotgan yosh avlodga yetib kelmoqda.

Shimoli-g‘arbiy harbiy okrug qo‘shinlari qo‘mondoni polkovnik Dilshod Choriyev, Mudofaa vazirligi huzuridagi Jamoatchilik kengashining Qoraqalpog‘iston Respublikasi hududiy bo‘limi boshlig‘i, senator Sharof Usnatdinov, bir guruh harbiy xizmatchilar va askarlarning tashrifidan keksalikdan nutq ravonligini yo‘qotgan otaxonning ma’yus nigohi-yu, yuzidagi tabassumdan ko‘ngli tog‘dek ko‘tarilganini sezish mumkin edi.

Mehmonlar bilan suhbatda otaxon qo‘lini duoga ochib, “Hech vaqt urush ko‘rmanglar, urush bo‘lmasin...” deya bir necha bor takrorladi. Darvoqe, urushni ko‘rgan insonlar tinchlikning har lahzasini o‘zgacha his etishadi, o‘zgacha qadriga yetadi.

Hademay yaqinlashib kelayotgan 9 may – Xotira va qadrlash kuni arafasida Mudofaa vazirligi rahbariyati va harbiy okrug qo‘shinlari qo‘mondonligi tomonidan Nazarboy otaga qimmatbaho sovg‘alar topshirilib, urush qatnashchisiga diqqat-e’tibor bilan qarab kelayotgan oila a’zolariga rahmat aytildi. Bugungi tinchlik va osoyishtaligimiz uchun urushda fashizmga qarshi kurashgan otaxonga minnatdorchilik bildirildi.

Nazarboy ota Tojiboyev istiqomat qilayotgan mahallada Nukus garnizoni harbiy orkestri tomonidan kuylangan Ikkinchi jahon urushi yillaridagi qo‘shiqlar mahalla ahliga ham bayram shukuhini hadya etdi.