London sudi F-35 komponentlarini Isroilga yetkazib berishni bloklashni rad etdi

Angliya va Uels Oliy sudi inson huquqlari faollarining Buyuk Britaniyaning Isroilga F-35 qiruvchi samolyotlari uchun butlovchi qismlar yetkazib berishni to‘xtatish haqidagi da’vosini rad etdi.

Bu haqda sudyalar Stiven Meyls va Karen Steyn qarorida aytilgan.

2024 yil sentyabr oyida Buyuk Britaniya hukumati Isroilga bir qator harbiy mahsulotlarni eksport qilish uchun ruxsatnomalarni to‘xtatdi. Bu avvalroq berilgan 350 ta qurol eksporti lisenziyasidan 30 tasiga tegishli. Cheklovlar, xususan, dronlar va harbiy vertolyotlar uchun komponentlar, shuningdek, quruqlikdagi nishonlarga qurolni boshqarish tizimlariga ta’sir ko‘rsatdi. Biroq, Isroil F-35 samolyotlari uchun AQSh orqali yetkazib beriladigan komponentlar uchun istisno qilingan.

Shundan so‘ng Falastinning Al-Haq inson huquqlari tashkiloti faollari London tomonidan yetkazib berilgan qurollar G‘azo sektorida xalqaro gumanitar qonunlarni buzish uchun ishlatilishi mumkinligini aytib, London sudiga Buyuk Britaniya Biznes va savdo vazirligi ustidan da’vo arizasi bilan murojaat qildi. "Biz da’vogarning sentyabr qaroriga e’tiroz bildirish uchun barcha asoslarini rad etamiz", - dedi Meyls va Steyn o‘z qarorida, harbiy tovarlar eksportini cheklash bo‘yicha qarorlarni sud emas, Britaniya hukumati qabul qilishi kerakligini ta’kidladi.