Koronavirusni unutamiz! Yamanda chigirtka balosi
Hozirda urushlar davom etayotgan va virus bilan kurashayotgan Yamanga chigirtka balosi ham xavf sola boshladi. Chigirtka to‘dalari Yamanning markaziy, janubiy va sharqiy hududlaridagi ekin maydonlarini vayron qilib, mamlakatda oziq-ovqat yetishmovchiligi yuzaga kelishining xavfini oshirmoqda.
Marib, Hadramout, Mahra va Abyan provinsiyalarida yashovchi fermerlarning aytishicha, millionlab chigirtkalar ekin maydonlari, shaharlar va qishloqlarga yetib borishgan hamda xurmo kabi mavsumiy ekinlarni yeb bitirishmoqda.
“Chigirtkalar xuddi o‘zi duch kelgan barcha narsani yakson qiluvchi bo‘ronga o‘xshaydi. Chigirtkalar barcha turdagi yashil daraxtlarni yeb tugatdi. Bundan ko‘rilgan zarar juda katta. Ushbu chigirtka to‘dalari yana tuxum qo‘yishgan va ular 10 kunda ochib chiqishi kutilmoqda. Shuning uchun biz chigirtka bosqinining ikkinchi to‘lqiniga tayyorlanyapmiz” deydi Hadramout Sah provinsiyasining qishloq xo‘jaligi rasmiylaridan biri Hussayn Bin Al-Shayx Abu Bakr.
Yamanda o‘tgan ikki oy ichida kuchli yomg‘irlar va suv toshqinlari ro‘y berdi. Bu esa chigirtkalarning ko‘payishiga ajoyib sharoit yaratdi.
Yamanda chigirtkalar kelishidan oldin ham ocharchilik bo‘lish xavfi borligi haqida aytilgandi. Jahon oziq-ovqat dasturi 10 iyul kuni Yamandagi aholini ta’minlash uchun zudlik bilan mablag‘ kerakligini, aks holda bu mamlakat aholisi ocharchilikka duch kelishini aytgandi.
“Hozirda Yamanda oziq-ovqat yetishmovchiligidan aziyat chekayotgan 10 million odam mavjud. Biz aynan shu odamlar uchun qayg‘urmoqdamiz. Ularning holatlari urushlar, karantin cheklovlari va koronavirusning ijtimoiy-qtisodiy ta’siri tufayli yomonlashib bormoqda” deydi Jahon oziq-ovqat dasturi matbuot kotibi Elizabet Birs.
