Kim Chen In ommaviy marosimda Shimoliy Koreya bosh vaziri o‘rinbosarini ishdan haydadi

Shimoliy Koreya yetakchisi Kim Chen In Ryonsons mashinasozlik majmuasini rekonstruksiya qilish va modernizasiya qilishning birinchi bosqichi yakunlanganiga bag‘ishlangan marosimda Bosh vazir o‘rinbosari Yang Sin Xoni ishdan bo‘shatdi.

Bu haqda Koreya Markaziy axborot agentligi xabar berdi.

Tadbirda nutq so‘zlagan Kim Chen Inning so‘zlariga ko‘ra, modernizasiyaning birinchi bosqichi "mas’uliyatsiz, qo‘pol va qobiliyatsiz rahbarlar tufayli keraksiz sun’iy tartibsizliklarga duch keldi, bu esa qiyinchiliklar va katta iqtisodiy zararlarga olib keldi".

U ba’zi rahbarlar "umuman mamlakatda sanoatni soddalashtirish va texnik qayta qurishga tayyor emasliklarini" ta’kidladi va "mag‘lubiyatga, mas’uliyatsizlikka va passivlikka o‘rganib qolganlarga tayanishni bas qilishga" chaqirdi. Ushbu so‘zlardan so‘ng Kim Chen In Bosh vazir o‘rinbosari Yang Sin Xoni o‘sha yerning o‘zida ishdan bo‘shatdi va uni "aravaga bog‘langan echki" bilan taqqosladi. Biroq, mamlakat rahbari Bosh vazir o‘rinbosari partiyaga qarshi harakatlarni sodir etganiga ishonmasligini; aksincha, bu tasodifiy kadrlar xatosi ekanligini aytdi.

Koreya Markaziy axborot agentligi xabariga ko‘ra, marosim ishtirokchilari Kim Chen Inni to‘liq qo‘llab-quvvatlashlarini bildirishdi. Shundan so‘ng, Bosh vazir Pak Txe Song qurilishning yakunlanishini nishonlash uchun qizil lentani kesdi va mamlakat rahbari Ryonsons mashinasozlik majmuasini ko‘zdan kechirdi. U korxona modernizasiya yo‘lida katta qadam tashlaganini va shu bilan mustaqil iqtisodiyot poydevorini mustahkamlaganini ta’kidladi.