Isroil hukumati ikki qishloqda falastinliklarga qarshi jamoaviy jazo qo‘lladi

Isroil rasmiylari Sharqiy Quddusda sodir etilgan qurolli hujum ortidan ikki qishloq aholisiga nisbatan jamoaviy jazo choralarini joriy etdi.

Isroil mudofaa vaziri Israel Kasning ma’lum qilishicha, hujum sodir etilgan Ramot yaqinidagi Katanna va Kubeyba qishloqlari aholisiga qarshi “fuqarolik sanksiyalari” qo‘llanadi.

Vazirning bayonotiga ko‘ra:

• mazkur qishloqlardagi barcha “noqonuniy” binolar buziladi;

• 750 nafar falastinlikning Quddusda ishlash uchun berilgan ruxsatnomalari bekor qilindi.

Avval ham Isroil hujumchilarning oilalariga nisbatan jamoaviy jazo usulidan foydalangan — uylarni portlatish va qarindoshlarini ish huquqidan mahrum qilish orqali.

Xalqaro hamjamiyat bu choralarni jamoaviy jazo va xalqaro huquqni buzish sifatida baholab kelmoqda. Shunga qaramay, Isroil rasmiylari bu amaliyotni davom ettirmoqda.