Hujjatsiz mashina boshqargan fuqaro YPX xodimlaridan qochib, yosh bolani urib yubordi

Buxoro viloyatida YPX inspektorlarining «to‘xtash» ishorasiga bo‘ysunmay, ulardan qochib, tezlikni oshirgan haydovchi yo‘l chetida koptok o‘ynab turgan yosh bolani urib yubordi. Bu haqda «Daryo»ga viloyat IIB YHXB axborot xizmati rahbari Ulug‘bek Shukrullayev ma’lum qildi.

Ta’kidlanishicha, 2020 yilning 19 oktyabr kuni viloyat IIB Yo‘l harakati xavfsizligi boshqarmasi xodimlari Kogon shahri va tumani kesishadigan A-380 avtomobil yo‘lining Chorobod chorrahasida xizmat olib borayotgan bo‘lgan. Soat taxminan 16:30 da yo‘l harakati qoidasini buzgan holda harakatlanib kelayotgan qora rangli, «Volga» rusumli 80 U 248 HA davlat raqam belgili transport vositasiga to‘xtash ishorasi berilgan. Ammo mazkur transport vositasini boshqarayotgan haydovchi P.R. YPX inspektorining qonuniy talabiga bo‘ysunmay, harakatlanishda davom etgan.

Shundan so‘ng YPX inspektori tomonidan aloqa vositasi yordamida ushbu yo‘nalishda xizmat olib borayotgan barcha xodimlar ogohlantirilgan. Mazkur transport vositasini to‘xtatish lozimligi to‘g‘risida xabar berilgan.

Transport vositasini boshqarayotgan haydovchi dastlab Kogon shahar Amir Temur ko‘chasi bo‘ylab harakatlanib, yo‘nalishini Elobod ko‘chasining tor yo‘li tomon o‘zgartirgan. Ushbu ichki tor yo‘lda voyaga yetmagan bolalar koptok o‘ynab turganini ko‘rib ham tezlikni pasaytirmagan. «Volga» haydovchisi ehtiyotsizlik oqibatida voyaga yetmagan bolalardan birini urib yuborib, unga tan jarohati yetkazgan. Haydovchi jabrlanuvchiga birinchi tibbiy yordam ko‘rsatmay, harakatlanishda davom etgan. Asosiy yo‘lga chiqqan vaqtda Amir Temur ko‘chasida xizmat olib borayotgan YPX inspektorini ko‘rib, ushbu inspektorning ham to‘xtash ishorasiga bo‘ysunmagan. Amir Temur ko‘chasidan Vatanparvar ko‘chasiga burilib, oxiri berk ko‘chaning tugash joyida avtomashinani tashlab qochgan.

«YPX xodimi bizga qonuniy to‘xtash ishorasini berdi. Hujjatlarimiz yo‘qligi sabab to‘xtamadik. Sherigimda haydovchilik guvohnomasi bo‘lmagani uchun men boshqarib kelayotgan edim. Bir bolaning oyog‘ini bosib oldim. Shu sababli qo‘rquvimiz yanayam oshdi. O‘sha paytda o‘zimni yo‘qotib qo‘ygandim», — deydi fuqaro P.R.

Olib borilgan tezkor surishtiruv harakatlari davomida mazkur haydovchining yonida transport vositasini boshqarish huquqini beruvchi ishonchnoma bo‘lmagan. Shu sababli inspektorning to‘xtash ishorasiga bo‘ysunmay harakatlanishda davom etgan.

«Fuqaroning avtomashinasini quvib ushlash yoki kuzatuv harakatlari olib borilmaganligi aniqlandi. Shuningdek, hodisa sodir bo‘lgan joyda chaqiruv asosida tergov tezkor guruhi va tez tibbiy yordam xizmati o‘z vaqtida yetib kelib, mazkur holat belgilangan tartibda ro‘yxatga olingan va tegishli tartibda rasmiylashtirilgan», — deydi Ulug‘bek Shukrullayev.

Ayni paytda holat bo‘yicha Kogon shahar IIB huzuridagi tergov bo‘linmasi tomonidan tergovga qadar tekshiruv harakatlari va viloyat IIB tomonidan xizmat tekshiruvi o‘tkazilmoqda.