Hizbullohning tahdidli bayonoti e’lon qilindi
Hizbulloh bosh kotibi o‘rinbosari Naim Qosim Beyrutda so‘zlagan nutqida 100 ming isroillikni Livan chegarasi yaqinidagi uylariga qaytarishga qaratilgan keng ko‘lamli Isroil urushi «yana yuz minglab odamlarning ko‘chirilishiga olib kelishini» aytdi.
Isroil 9-kanalining yozishicha, Hizbulloh rahbari o‘rinbosari shu tariqa yahudiy davlati mudofaa vaziri Yoav Galantning Isroil shimoliy chegaralarida xavfsizlikni tiklashga qaror qilgani haqidagi bayonotiga javob berdi.
«Biz urushga kirishmoqchi emasmiz, chunki bu hech qanday foyda keltirmasligiga ishonamiz. Ammo, agar Isroil urush boshlasa, biz ular bilan yuzma-yuz uchrashamiz va ikkala tomon ham katta yo‘qotishlarga duchor bo‘ladi», — deya ogohlantirdi Qosim.
11 sentyabr kuni Isroil shimolida joylashgan Oded brigadasining zahiradagi askarlari bilan uchrashuvda Yoav Galant ularni Livanda quruqlikdagi operasiyaga tayyorlanishga chaqirdi.
