Grippdan so‘ng organizmning tiklanishi uchun qancha vaqt kerak?

Grippdan so‘ng organizmning tiklanishi uchun qancha vaqt kerak?

Ushbu savolga SSV matbuot xizmati Respublika virusologiya ilmiy tekshirish instituti klinikasi bosh shifokori Muhayyo Asilovadan javob oldi:

— Grippga xos belgilar barchamizga yaxshi ma’lum. Biroq isitma me’yorlashib, yo‘tal va burun oqishi to‘xtagach, ko‘pchilik kasallikdan to‘liq tuzaldim, deb o‘ylaydi. Bu — yanglish xulosa.
Vaholanki, xastalikning o‘tkir bosqichidan so‘ng jismoniy va ruhiy toliqqan, suvsizlangan hamda ko‘p quvvat yo‘qotgan organizmning tiklanish davri boshlanadi. Bu vaqtda tanada holsizlik, charchoq va zaiflik kuzatiladi.
O‘rganishlarga ko‘ra, grippning yengil shaklida organizm taxminan yetti-o‘n kun ichida tiklanadi. Kasallikning o‘rta og‘ir bosqichida bu muddat o‘n-o‘n to‘rt, ba’zan 21 kungacha cho‘ziladi. Grippning og‘ir shaklini to‘liq yengib, quvvatga kirish uchun esa uch oy vaqt kerak.
Bu hammada har xil kechadi. Tiklanish muddati bemorning kasallik boshlanishidan avvalgi immuniteti holatiga bog‘liq. Chunki virus surunkali xastaliklarni qo‘zg‘atib yuborishi mumkin.
Qolaversa, gripp asoratlari nafaqat otit va sinusit, balki virusli pnevmoniya, meningit, yurak ishemik kasalliklari, bronxial astma va surunkali bronxitni ham keltirib chiqarishi ehtimoli mavjud.
Bu viruslarga qarshi kurashdan so‘ng immunitet zaiflashib, ichki a’zolar faoliyati buzilishi bilan izohlanadi. Shuningdek, xastalik chog‘ida infeksiyalar tufayli asab tizimi zararlanadi. Oqibatda bemor to‘liq oyoqqa turganidan keyin ham toksinlarning miyaga ta’siri uzoq davom etadi.
Shu bois, bemor holsizlik, jizzakilik, bosh og‘rig‘i, uyqu buzilishi, xotira susayishi va ish qobiliyati pasayishidan aziyat chekadi.

O‘z navbatida, muolaja jarayonida foydalanilgan dori-darmonlarning jigar, buyrak va ovqat hazm qilish tizimiga ayrim nojo‘ya ta’sirlari sezilishi mumkin.

Shu bois grippdan tuzalgan bemorlardan quyidagilar talab etiladi:
- jismoniy faollik va stressdan saqlanish;
- immunitetni mustahkamlash;
- to‘g‘ri ovqatlanish;
- vitamin terapiyasi;
- ichak mikroflorasini tiklashga qaratilgan dori-darmon muolajaci;
- massaj va fizioterapiya mashqlari.


Matnda xatolik topsangiz, o‘sha xatoni belgilab, bizga jo‘nating (Ctrl + Enter)

Bo'limga tegishli qiziqarli xabarlar

Fikr bildirish uchun qaydnomadan o'tishingiz so'raladi va telefon rakamni tasdiklash kerak buladi!