G‘azo atrofida keskinlik kuchaymoqda: Isroil BMT Kengashidan chiqdi, G‘arb esa falastinliklarni ko‘chirish rejasini rad etdi

Isroil BMT Inson huquqlari kengashi (UNHRC) tarkibidan chiqishini e’lon qildi va bunga kengashning «biryoqlamaligi» sabab bo‘layotganini bildirdi. Isroil tashqi ishlar vaziri Gideon Saar bu haqda BMT Kengashi Prezidenti Yurg Lauberga rasmiy xat yubordi. Uning ta’kidlashicha, 2006 yilda UNHRC tashkil etilgandan beri Isroilga nisbatan adalatsiz munosabat saqlanib qolmoqda.

Ushbu qaror xalqaro hamjamiyatda turlicha munosabatga sabab bo‘ldi. BMT maxsus ma’ruzachisi Francheska Albanese buni «o‘ta jiddiy qadam» deb atadi. Shu bilan birga, AQSh Prezidenti Donald Tramp ham AQShning BMT Inson huquqlari kengashi bilan hamkorligini to‘xtatish to‘g‘risida farmon imzoladi.

Bu orada G‘arb davlatlari Isroilning falastinliklarni G‘azodan chiqarish rejasini qat’iyan rad etmoqda. Ispaniya, Irlandiya va Buyuk Britaniya Isroil mudofaa vaziri Isroil Katsning bayonotini tanqid qildi. Katsning aytishicha, Falastinni tan olgan ushbu davlatlar endi G‘azo aholisini qabul qilishga majbur.

Bunga javoban Irlandiya asosiy e’tibor insonparvarlik yordami ko‘rsatishga qaratilishi lozimligini bildirdi. Buyuk Britaniya esa falastinliklarning majburiy ko‘chirilishiga qat’iyan qarshi chiqib, G‘azoning kelajagini o‘zi falastinliklar belgilashi kerakligini ta’kidladi.

Shu bilan birga, Donald Tramp o‘zining G‘azo bo‘yicha rejasiga oydinlik kiritdi. Uning so‘zlariga ko‘ra, AQSh G‘azoni nazorat ostiga olishi mumkin, biroq bu jarayonda Amerika harbiylari ishtirok etmaydi. Falastinliklar «xavfsiz hududlarga» ko‘chirilishi kerak, G‘azoni qayta tiklash esa xalqaro tashkilotlar zimmasiga yuklanadi.