Fransiya Armanistonni Rossiyadan himoya qilishni va’da qilmoqda
Fransiya tashqi ishlar vaziri Stefan Sejurne Armanistonni «Rossiya bosimidan» himoya qilishga va’da berdi. Bu haqda u 16 sentyabr kuni ertalab Yerevanda demokratik Yevropa qadriyatlarini himoya qilishga bag‘ishlangan matbuot anjumanida ma’lum qildi.
Sejurne Armaniston va Fransiyaning umumiy qadriyatlarini ta’kidlab, «bosim ko‘rsatishga urinayotgan Rossiyaning tahdidlari va ochiq dushmanligiga qaramay» Armaniston xalqi va hukumatini qo‘llab-quvvatlashini bildirdi. Uning ta’kidlashicha, Armaniston to‘siqlarga qaramay, bosqichma-bosqich demokratiya sari qadam tashlamoqda.
«Demokratik qadriyatlarni himoya qilishda har doim bizning yordamimizga tayanishingiz mumkin», deb va’da berdi Sejurne va Fransiya ushbu qadriyatlar uchun kurashayotgan barcha mamlakatlarga yordam berishini qo‘shimcha qildi.
«Fransiya doim yoningizda. Fransiyada siyosiy kuchlar o‘rtasida kelishuvga erishilgan mavzular kam. Armaniston ana shunday kam sonli mavzulardan biridir», - dedi vazir.
Avvalroq Armaniston bosh vaziri Nikol Pashinyan Armaniston va Yevropa Ittifoqi o‘rtasidagi viza rejimini qayta ko‘rib chiqish bo‘yicha muzokaralar boshlanganini ma’lum qilgandi. Bu haqda Yevrokomissiya rahbari o‘rinbosari Margaritis Shinas bilan uchrashuvda aytilgan.
