Farg‘onada «Matiz» mashinasida yonib ketgan ayol fojiasining asosiy sababi nima edi?

2023 yilning 24 yanvar kuni soat taxminan 19-larda Farg‘ona shahrida 29 yoshli Muhammadali Usmonov «Matiz» rusumli avtomashinasida homilador turmush o‘rtog‘i (shar’iy nikoh asosida), 36 yoshli Mahliyo Haydarovani shifoxonadan yashash xonadoniga olib ketayotgan vaqtida rashk tufayli o‘rtada janjal kelib chiqadi.

Ushbu voqealar chizgisi Farg‘onada o‘tgan hafta sodir bo‘lgan, aytish mumkinki, o‘ta mash’um hodisani qayta yodingizga solgandir. Darhaqiqat, M. Usmonov turmush o‘rtog‘i bilan gaplashib olish maqsadida avtomashinani «Neftchi» stadioni ro‘parasida to‘xtatgani, kutilmaganda avtomashina orqa o‘rindig‘ida o‘tirgan ayol o‘zi bilan uyidan olib chiqqan plastmassa idishdagi benzin yoqilg‘isini dastlab turmush o‘rtog‘i, keyinchalik o‘zi va avtomashina saloni ichiga sepgani, qo‘rqib ketgan erkak avtomashinadan tushib, tashqariga qochgan vaqtda ayol yondirgich bilan o‘zini va avtomashinani yoqib yuborgani chindan ham dahshatli. Yanada achinarlisi, chaqiruvga asosan hodisa joyiga yetib kelgan Farg‘ona viloyati favqulodda vaziyatlar boshqarmasi xodimlari tomonidan yong‘in tezkorlik bilan o‘chirilib, shoshilinch tibbiy yordam xodimlari tomonidan avtomashina salonida bo‘lgan marhumaning yong‘in natijasida tug‘ilgan chaqalog‘i shifoxonada ko‘rsatilgan zarur tibbiy yordamga qaramay, vafot etgani har qanday inson qalbini larzaga keltiradi.

Ayni paytda ushbu holat yuzasidan Farg‘ona shahar prokuraturasi tomonidan Jinoyat kodeksining 103-moddasi 2-qismi «b» bandi (O‘zini o‘zi o‘ldirish darajasiga yetkazish) bilan jinoyat ishi qo‘zg‘atilib, dastlabki tergov harakatlari olib borilmoqda.

Xo‘sh, Internet tarmoqlari va OAV vositalari orqali turlicha talqin etilayotgan mazkur fojianing asl sababi nimada edi? Farg‘ona viloyati hokimi o‘rinbosari – oila va xotin-qizlar boshqarmasi boshlig‘i Komila Kavlonova holatni o‘rganish maqsadida marhuma tug‘ilib o‘sgan Marg‘ilon shahri «Ahmad Yassaviy» MFY Yoshlarobod ko‘chasidagi xonadonda bo‘ldi.

Oilaning turmush tarzi bilan tanishib, tezkor ravishda ularga ijtimoiy va psixologik yordam ko‘rsatish choralari ko‘rildi. Bundan tashqari holat bo‘yicha mutasaddi mansabdor shaxslar va jamoatchilik vakillari o‘rtasida muhokama tashkil etish chora-tadbiri rejalashtirildi.

O‘z navbatida shu kunning o‘zida Muhammadali Usmonov istiqomat qilayotgan Farg‘ona shahridagi «Huvaydo» MFYda joylashgan yashash xonadonida ham bo‘ldilar.

Ma’lum bo‘lishicha, Muhammadali 2022 yilning 28 avgust kuni Rossiyadan kelib, 19 noyabr kuni fuqaro M. Homidova bilan Farg‘ona shahar 2-sonli FHDYo orqali qonuniy nikohdan o‘tishgan.

Suhbat jarayonida aniqlanishicha, Muhammadali Rossiyada ishlab yurgan vaqtida Mahliyo ismli ayol bilan tanishib, o‘zidan 8 yosh katta va 1 nafar voyaga yetmagan farzandi bo‘lishiga qaramay, shar’iy nikoh orqali yashab yurishgan. Bu haqida Muhammadali Usmonov oila a’zolarining umuman xabari bo‘lmagan. Ammo Muhammadali va Mahliyo o‘rtasiga sovuqchilik tushib, Rossiyadayoq ularning munosabati buzilgan.

2022 yil 19 noyabr kuni Muhammadali oila qurganidan xabar topgan Mahliyo unga homilador ekanligi bois yana birga yashash taklifini bildirgan.

Muhammadali Usmonov yangi oila qurganligini aytib, rozi bo‘lmagan. Shundan so‘ng 202Z yil 12 yanvar kuni noma’lum shaxs tomonidan Muhammadali Usmonov yashash uyining ko‘cha tomonidagi tabiiy gaz muhrlari o‘chirilib, shaxsiy avtomashinasining ballonlari teshib ketilgan. Yashirin kamera orqali bu ishni Mahliyo sodir etgani aniqlangan.

2023 yil 24 yanvar kuni Mahliyo Muhammadaliga telefon orqali bog‘lanib, ahvoli yomonlashganligi, tezda kelib Farg‘ona shahar tug‘uruq bo‘limiga olib borishini aytgach, uni ijarada turgan manzilidan kasalxonaga olib kelayotganida yuqoridagi fojea yuz bergan.

Shu yilning 11 yanvar kuni Farg‘ona shahar «Madaniyat» mahalla fuqarolar yig‘ini ishchi guruhi a’zolari xonadonma-xonadon kirib ayollar muammolarini o‘rganishi davomida Qo‘qon ko‘chasining 60-uy, 18- xonadonda ijarada turgan Mahliyo Haydarova bilan yuzma-yuz muloqot o‘tkazishgan. M. Haydarova muloqot asnosida 2022 yilning noyabr oyidan buyon 2013 yilda tug‘ilgan Malikaxon ismli qizi va turmush o‘rtog‘i bilan birga mazkur uyda ijarada yashayotganligini ta’kidlagan.

Suhbat chog‘ida ayol Marg‘ilon shahridagi doimiy yashash hududida tabiiy gaz va elektr energiyasi yo‘qligi sababli qish mavsumini o‘tkazib, yaqin kunlarda ikkinchi farzandini dunyoga keltirishi va chillasi chiqishi bilan doimiy yashash xonadoniga ketishini aytgan.

— Ba’zan loqaydligimiz, muammoning asl ildiziga yetib borishga kech qolishimiz tufayli shu kabi ayanchli fojia kelib chiqayotgani achinarlidir, — deydi Farg‘ona viloyati hokimi o‘rinbosari – oila va xotin-qizlar boshqarmasi boshlig‘i Komila Kavlonova. — Bunday holatlar ikki oilaning emas, butun boshli jamiyatning muammosi sifatida qaralishi zarur. Afsus, onaga qo‘shilib chaqaloq ham nobud bo‘ldi. Xotin-qizlar, mahalla faollari, ota-onalar ishtirokida ushbu fojiani atroflicha o‘rganib, kelgusida bu kabi ko‘ngilsizliklar sodir bo‘lmasligi uchun ayollar muammolari bilan ishlashda yangicha yondashuvlarga o‘tish zarurligini yana bir karra his qildik.