Farg‘onada arzimagan mojaro o‘lim bilan tugadi
Hayotda uzoqni ko‘ra bilmaslik, jizzakilik va gumrohlik kutilmagan fojiani keltirib chiqarish mumkin. Quyida ana shunday voqea tafsiloti bayon qilinadi.
Asliddin (ism-shariflar o‘zgartirildi) ishbilarmon, g‘ayrat-shijoatli bo‘lib voyaga yetdi. Uylangach, yer maydoni sotib olib, uy qurdi, oilasi bilan ko‘chib chiqdi. Yaqindagina yap-yangi «Spark» rusumli avtomashina ham sotib olgandi. O‘sha kuni ertalab Asliddin avtomashinasida bolalarini maktabga eltib qo‘ydi, so‘ng ota-onasidan xabar olgani bordi.
Ammo falokat oyoq ostida deb bejizga aytishmagan ekan. U avtomashinasini boshqarib borayotganida muyulishda to‘satdan qo‘shnisi Berdinazar Ismatov velosipedda chiqib qoldi. O‘rtadagi masofa juda qisqa edi. Asliddin mashinasini, Berdinazar esa, velosipedini to‘xtatib qolishga ulgurishmadi. Velosiped avtomashinaning oldi tomoniga kelib urildi. To‘qnashuv chog‘ida B. Ismatov o‘ng tomoni bilan yerga yiqildi. Xayriyatki, unga hech narsa qilmadi. Ammo velosiped pachoqlanib ketgandi.
Buni ko‘rib, B. Ismatov Asliddindan yangi velosiped olib berishni talab qildi.
— To‘g‘ri, men aybdorman, — dedi Asliddin. — Ammo yaqinda mashina oldim, shuning uchun yangi velosiped sotib olishga hozircha imkonim yo‘q. Siz vaqtincha otamning velosipedidan foydalanib turing, keyinroq yangisini olib beraman.
Asliddining bu taklifi B. Ismatovga ma’qul tushmadi. «Otangning velosipedi menga kerak emas», — dedi u zarda bilan.
Shu tariqa ular voqea joyidan tarqalishdi. Asliddin ota uyiga kelgach, ro‘y bergan ko‘ngilsiz hodisani aytib berdi. B. Ismatov esa, yaroqsiz holga kelgan velosipedini uyiga olib ketdi.
O‘sha kuni tushdan so‘ng Asliddin B. Ismatovning uyiga bordi, ammo u hali ishdan qaytmagan ekan. Shundan so‘ng u tog‘asi Akromga yuz bergan voqeani aytib berdi. «Siz Berdinazar akaning uyiga borib, sharoitimni tushuntiring, yangi velosipedga pul yiqqunimga qadar sabr qilib tursin», — deya u iltimos qildi. Ammo tog‘asi garchi va’da bergan bo‘lsa-da, B. Ismatov bilan uchrashishga vaqt topolmadi.
Ertasi kuni tunda B. Ismatov shirakayf holatda Asliddinning otasi F. Ro‘ziqulovning uyiga keldi. U oilaning kenja o‘g‘li Nuriddindan Asliddinning uyali telefon raqamini so‘radi. Nuriddin akasining telefon raqamini yoddan bilmasligini, qo‘shni hovlida yashaydigan akasi Ahliddindan so‘rashni aytdi.
Ayni damda o‘zini jabrlangandek his etayotgan B. Ismatovga Nuriddinning bu gapi xuddi ayildek og‘ir botdi. Shu bois ikkalasi aytishib qolishdi. Ularning baqiriq-chaqirig‘ini eshitgan Ahliddin o‘rtaga tushib, ularni tinchlantirdi. Shundan so‘ng B. Ismatov uyiga ketdi.
Qani edi, shu bilan barchasi yakun topsa… Biroq bunday bo‘lmaydi, oradan yigirma daqiqa o‘tgach, B. Ismatov tajovuzkor qiyofada yana F. Ro‘ziqulovning uyiga keldi va haqoratli so‘zlarni yog‘dirgancha darvozani ochishni talab qila boshladi.
Bu gal darvozani F. Ro‘ziqulovning turmush o‘rtog‘i Inobat aya ochdi:
— Nega yarim tunda bizni bezovta qilayapsan? Yangi velosiped olib beramiz, deb aytdi-ku?! — dedi u jahl aralash. Ammo jahldan o‘zini qayerga qo‘yishni bilmay turgan B. Ismatovga ayolning gapi ta’sir qilmadi.
Aksincha, u battar haqorat qilishga tushdi. Uning baqirib haqoratlashini eshitib, Ahliddin uyidan chiqib keldi. Bir pasdan so‘ng oilaning kenja o‘g‘li Nuriddin ham tashqariga chiqdi.
— Sen kimni so‘kayapsan? — deya Nuriddin B. Ismatovga o‘dag‘aylayotganda, uni otasi va akasi Ahliddin to‘xtatib qolishdi. Ammo bu bilan janjal tinchimadi. F. Ro‘ziqulov B. Ismatovni tinchlantirishga urinayotganda, Nuriddin uning yoqasidan tutib, itarib yubordi. Oqibatda B. Ismatov suvsiz ariqqa yiqilib tushdi. Shundan so‘ng u battar qahrga to‘lib, o‘rnidan otilib turdi va cho‘ntagidan oshxona pichog‘ini olib Ahliddinning qorni va chap qo‘liga sanchdi…
Qo‘ni-qo‘shnilar jarohat olgan Ahliddinni kasalxonaga jo‘nayotgan pallada bundan ham og‘ir fojia ro‘y berdi. Gap shundaki, butkul aql-hushini yo‘qotgan B. Ismatov F. Ro‘ziqulovning bo‘yin qismiga pichoq sanchdi. Keyin esa, yanada quturib, uning chap biqiniga ikki marta pichoq urdi.
Afsuski, og‘ir jarohat olgan F. Ro‘ziqulov voqea joyida hayotdan bevaqt ko‘z yumdi.
Birinchi bosqich sudi sudlanuvchi B. Ismatovning marhum F. Ro‘ziqulov va A. Ro‘ziqulovni o‘ldirish maqsadi bo‘lmagani to‘g‘risidagi ko‘rsatmalarini o‘rganib chiqdi. Ammo uning bu ko‘rsatmalarini asossiz va javobgarlikdan qutulib qolish yoki javobgarlikni yengillashtirish maqsadida o‘ylab topilgan vajlar deb baholadi. Chunki F. Ro‘ziqulov va uning o‘g‘illari keyinroq yangi velosipedni olib berishni yoki shikastlangan velosipedini tuzatib berishni aytishganda, B. Ismatov bunga rozi bo‘lgan. Biroq 2021 yil 14 aprel kuni F. Ro‘ziqulovning uyiga spirtli ichimlik ta’sirida mast holda borib, janjal ko‘targan. Uni tinchlantirishga urinib, uyiga jo‘natishganiga qaramay u yo‘lda ketayotib, F. Ro‘ziqulov va uning oila a’zolariga qarab «hozir qaytib kelib hammangni o‘ldiraman» deya tahdid qilgan. Ayni shu holat uning odam o‘ldirish jinoyatini sodir qilishni ko‘zlaganini anglatadi. Bu holat jabrlanuvchi va guvohlarning ko‘rsatmalari bilan ham to‘liq tasdiqlandi.
Qisqasi, sud hukmi bilan sudlanuvchi B. Ismatov Jinoyat kodeksining 97-moddasi 1-qismi hamda 25,97-moddasi 2-qismi «a» bandida ko‘rsatilgan jinoyatlarni sodir etganlikda aybdor deb topildi. Sudlanuvchiga nisbatan ayblangan har bir modda bo‘yicha alohida-alohida ozodlikdan mahrum qilish jazosi tayinlanib, Jinoyat kodeksining 59-moddasiga ko‘ra, tayinlangan jazolarni qisman qo‘shish yo‘li bilan jinoyatlar majmui bo‘yicha B. Ismatovga 17 yil muddatga ozodlikdan mahrum qilish jazosi tayinlandi.
Xulosa o‘rnida ta’kidlash joizki, gumrohlik tufayli og‘ir fojia ro‘y berdi. Jazavaga tushish, aql bilan ish tutmaslik bir odamning umriga zomin bo‘ldi. B. Ismatov qilmishi uchun tayinlangan muqarrar jazo muddatini o‘tashi tayin. Ammo vijdon azobidan qutulish imkoni bormikan? Masalaning eng og‘riqli jihati shunda.