Epshteynning Deutsche Bankda 40 dan ortiq hisobi bo‘lgan va Yevropadan bank sotib olishni ham rejalashtirgan

Zeit gazetasining Deutsche Bank vakiliga tayanib xabar berishicha, bank 2020 yildan beri bir necha bor ta’kidlaganidek, 2013 yilda Jeffri Epshteynni mijoz sifatida qabul qilgani xato bo‘lganini ma’lum qilgan. Oxirgi e’lon qilingan “Epshteyn fayllari”ga ko‘ra, 2018 yilgacha u nemis bankida 40 dan ortiq hisob raqamiga ega bo‘lgan.

Deutsche Bank vakiliga ko‘ra, 2018 yil dekabrda bankning o‘zi amerikalik moliyaviy ekspert Jeffri Epshteyn bilan aloqalarni to‘xtatish harakatini boshlagan.

Epshteyn AQSh banklari o‘rniga nega nemis bankini tanlaganini izohlab, bir tanishiga: "Sog‘lom fikrli birorta odam o‘z tuzilmalarining bir qismi sifatida AQShda bank ochishni xohlamaydi. Bu AQSh hukumatiga sizning shaxsiy hayotingizga aralashish imkonini beradi", — deb yozgan.

NDR, WDR va Süddeutsche Zeitung ma’lumotlariga ko‘ra, ushbu yozishmalar doirasida Epshteyn Yevropaning eng yirik xususiy banklaridan biri bo‘lgan Kyoln shahridagi Sal. Oppenheim bankini sotib olish harakatiga tushgani aniqlangan.

Moliyachi J.P Morgan banki orqali bankning egalik qiluvchi oilalari bilan shaxsiy aloqalarni yo‘lga qo‘yishga urinib, bitim uchun 500 million dollar to‘lashga tayyor bo‘lgan.

J.P Morgan vakillari bildirishicha, Epshteyn bilan yozishmalar olib borgan bank xodimlari tashkilot nomidan emas, shaxsiy tashabbus bilan aloqa o‘rnatgan.