“Bo‘ston” qachon nomiga munosib bo‘ladi?

 

Farg‘ona viloyati Rishton tumanida “Obod qishloq” dasturi asosida “Xurramobod” va “Bo‘ston” mahalla fuqarolar yig‘inlarida keng ko‘lamli bunyodkorlik ishlari olib borilishi belgilangan. Hozirga qadar manzilli chora-tadbirlarga muvofiq, mazkur hududlarda bir qator ishlar bajarildi.

 

Xususan, “Xurramobod” mahalla fuqarolar yig‘inida ichki yo‘llar ta’mirdan chiqarildi, ko‘chalar obodonlashtirilib, tobora chiroy ochmoqda, turli maishiy xizmat ko‘rsatish shoxobchalari qad rostlamoqda. Kam ta’minlangan oilalarga moddiy yordam ko‘rsatilib, tadbirkorlarga imtiyozli kreditlar ajratilmoqda. Albatta, bu kabi ezgu sa’y-harakatlar qishloq odamlari hayotini yanada farovon etish, turmush darajasini yuksaltirishga qaratilgani bilan ahamiyatlidir.

 

Afsuski, Farg‘ona-Qo‘qon avtomobil yo‘lida joylashgan “Bo‘ston” mahalla fuqarolar yig‘inida mazkur yo‘nalishdagi ishlar sust bajarilmoqda. 

Sababi, dastur ijrosiga mutasaddi bo‘lgan rahbarlar bunga befarq munosabatda bo‘layotir. Hududdagi katta yo‘l bo‘yida joylashgan, talabga javob bermaydigan uy-joylar, maishiy xizmat ko‘rsatish shoxobchalari buzilib, zamonaviy me’morchilik asosida qayta qurilishi belgilangan. Ammo mas’ul tijorat banklari tomonidan bu yerdagi tadbirkorlar va aholiga kredit ajratishda mas’uliyatsizlikka yo‘l qo‘yilmoqda. “Qishloq qurilish bank” va “Ipoteka bank” Farg‘ona filiallari xodimlari faoliyatiga aholida haqli e’tirozlar bo‘lmoqda. Chunki, tijorat banklari vakillari “quruq va’dalar” bilan yuribdi. 

 

– Mahallamiz obod bo‘lsa, sharoitlar yaxshilansa, bizga ham yaxshi-ku, – deydi shu yerda yashovchi Karimjon Omonov. – Biz asosan tadbirkorlik va hunarmandchilik bilan shug‘ullanamiz. Men faoliyatimni yanada rivojlantirish uchun banklardan 200 million so‘m kredit so‘rab, sarson bo‘lyapman. Ular tomonidan bildirilayotgan turli bahona-yu vajlar hammaning hafsalasini pir qilmoqda.

Namunaviy loyiha asosida uy-joylar qurish va ta’mirlash, loyiha-smetalarini ishlab chiqish borasida ham mutasaddi tashkilotlar qo‘l qovushtirib turganini qanday izohlash mumkin? Aksariyat xonadonlarning kadastr hujjati yo‘q. Ehtimol, mana shular ham banklarning kredit ajratishida to‘siq bo‘layotgandir...

 

Uch mingdan ortiq aholi istiqomat qilayotgan mahalla fuqarolar yig‘inida aholi asosan hunarmandchilik va tadbirkorlik bilan shug‘ullanadi. E’tiborli jihati, Rishton azaldan hunarmandchiligi bilan ham mashhur. Shuning uchun tumanga ko‘plab xorijlik sayyohlar tashrif buyuradi. Albatta, bu hudud yanada obod bo‘lib, infratuzilmasi yaxshilansa, aholining ham farovonligi oshadi. Vaqt o‘tib bormoqda, amaliy ishdan esa darak yo‘q.

– Dastur ijrosini ta’minlash maqsadida hududdagi har bir xonadonga kirib, tushuntirish ishlari olib bordik, – deydi tuman Davlat soliq inspeksiyasi boshlig‘i, sektor rahbari Lazizjon Xoliqberdiyev. – Haqiqatan ham “Bo‘ston” mahalla fuqarolar yig‘inida bir qator muammolar yig‘ilib qolgan edi. Bu muammolarni amaliy hal etish uchun aniq chora-tadbirlar belgilab olingan. 28 tadbirkorlik sub’ekti tomonidan savdo majmualari tashkil etilmoqda, ichimlik suvi muammosi ham o‘z yechimini topmoqda.

 

Bugun bu yerdagi aholi “Obod qishloq” dasturidan ko‘p narsalarni kutmoqda. Faqat ularga zarur ko‘mak ko‘rsatish, og‘irini yengil qilish kerak, xolos. Bo‘ston o‘z nomi bilan bog‘-u bo‘stonga, obod maskanga aylanishi kerak.