Boltiq dengizida XIX asrda cho‘kib ketgan shampan ortilgan kema topildi

XIX asrda cho‘kib ketgan kema bortida shampan vinosi kolleksiyasi bilan Polsha g‘avvoslarining noyob topilmasi hisoblanadi. Qimmatbaho butilkalar buzilmagan, deb yozadi Euronews.

Yaqinda bir guruh polshalik mutaxassislar Boltiq dengiziga ekspedisiya chog‘ida eski baliqchi qayig‘iga o‘xshash cho‘kib ketgan kemaga duch kelishdi. Dastlab g‘ayrioddiy hech narsa sezilmagan bo‘lsa-da, g‘avvoslar Marek Kakay va Pavel Trushinskiy kemani chuqur o‘rganishga qaror qilishdi.

Ularning qiziqishi bejiz emas edi: Boltiq dengizida 190 fut chuqurlikda XIX asrda yaxshi saqlanib qolgan yelkanli kema ichidan shampan kolleksiyasi topildi.

G‘avvoslar guruhi rahbari Tomash Stachuraning taxminiga ko‘ra, cho‘kib ketgan kemadan topilgan buyumlar – mineral suv, chinni, shampan shishalari Stokgolmdagi qirollik dasturxoni yoki Sankt-Peterburgdagi rus podshosi qarorgohi tomon ketayotgan bo‘lishi mumkin. Biroq, kema halokatga uchragan.

"Men 40 yildan ortiq g‘avvoslik bilan shug‘ullanaman va o‘z tajribamga ko‘ra, halokatga uchragan kemalarda bir nechta butilkalar topiladi, biroq men birinchi marta bunday katta shishalar jamg‘armasini ko‘rishim", - dedi Stachura Associated Press agentligiga.

Kema bortida spirtli ichimliklardan tashqari Selters yorlig‘i tushirilgan sopol idishlar ham topilgan bo‘lib, bu mineral suvlarning shifobaxsh xususiyati borligidan dalolat beradi. Shampan vinosining markasi hali aniqlanmagan, biroq Stachuraning so‘zlariga ko‘ra, shampan vinosi qopqog‘ida «R» harfini yaqqol ko‘rish mumkin.

Selters-an-der-Lan kompaniyasi shampan mutaxassislari va mineral suv yetkazib beruvchilari shishalarni laboratoriya sinovidan o‘tkazishga qiziqish bildirishdi. Stachuraning ta’kidlashicha, cho‘kib ketgan kemani tekshirish bo‘yicha keyingi qarorlar Shvesiya rasmiylari tomonidan qabul qilinadi.