Avvalgi payg‘ambar alayhimussalomlar ko‘pxotinli bo‘lmaganmi?

Qayta-qayta guvoh bo‘layotganimiz voqea – payg‘ambarimiz Muhammad sollallohu alayhi vasallam haqidagi noxolis ma’lumotlar haqida so‘zlamoqchimiz. Biron bir musulmon kimsa hech qachon payg‘ambar alayhimussalomlardan birini masxara qilmaydi. Payg‘ambar alayhissalom ayoli nechtaligi, nima ish qilgani, nima voqealar bo‘lgani haqida salbiy fikrlar musulmonlardan sodir bo‘lmaydi. Ammo taassuflar bo‘lsinkim, boshqa din vakillari yoki dinsiz dahriylar tarafidan mana shundayin razil narsalar yozilib, payg‘ambari uchun jonini tikishga tayyor ummatning hislariga tegish, ularni g‘alayonga keltirishi kuzatilmoqda.

Bu toifaning eng ko‘p yopishib olgan mavzusi ko‘p xotinlik. Ular bu xususda turli maqolalar va karikaturalar qilishlari bilan mashhur. Muhammad sollallohu alayhi vasallamning birdan ko‘p ayollarga uylanganligini butun dunyoga salbiy tasvirlab, u zot alayhissalomni shahvatparastlikda ayblayotgan (na’uzubillah) ushbu nusxalar, bundayin ruxsat Alloh taoloning payg‘ambariga bergan ruxsati ekani, bu o‘sha payg‘ambar zamoni uchun salbiy voqea bo‘lmagani va, qolaversa, ko‘plab payg‘ambarlar ko‘payollik bo‘lganini bilisharmikan?

Inson xolis bo‘lishi lozim. Balki boshqa din vakillari yoki dahriylar uchun payg‘ambarlardan birini masxara qilish oddiy holdir. Ammo musulmonlar uchun ularning payg‘ambarini masxara qilinishi fojiadir. Zotan, musulmonlar o‘z payg‘ambari bo‘lmish Muhammad sollallohu alayhi vasallamni o‘zlari, ota-onalari va farzandlaridan-da ko‘proq sevishadi. 

Endi maqola mavzusi haqidagi ma’lumotlarga o‘tamiz. 

Payg‘ambarlar alayhimussalom ayollari haqida. Nabiy sollallohu alayhi vasallam hayotlari davomida o‘n bir ayolga uylanganlar. U zoti sharifalar: Xadija (Xadicha) binti Xuvaylid, Oisha binti Abu Bakr, Xafsa binti Umar, Savda binti Zam’a, Zaynab binti Jahsh, Zaynab binti Xuzayma, Ummu Salama binti Abu Umayya, Ummu Habiba binti Abu Sufyon, Juvayriya binti Horis, Safiyya bint Huyay, Maymuna bint Horis roziyallohu anhunna. 

Nikohlarida esa bir vaqtning o‘zida to‘qqiz ayollari bo‘lgan. Hadija bint Xuvaylid va Zaynab bint Xuzayma u zotning hayotlik chog‘laridayoq vafot etishgan. 

Bu ayollardan birinchisi bo‘lmish Hadija roziyallohu anho bilan to u sharafli ayol vafot qilgunicha birga yashaganlar. Shuningdek, boshqa ayollariga uylanishlari ham ba’zida asir musulmonlarni hayotini saqlab qolish, ba’zida esa himoyasiz qolgan beva ayolning himoyasi, ba’zan u zot uchun fidokor bo‘lgan sahobiylarga hurmat, yana ba’zida esa biron johiliyat odatini bekor qilish uchun bo‘lgan. U zot hayotlari davomida birgina qizga uylanganlar, qolgan barcha ayollari juvon bo‘lishgan. Vaholanki, atroflarida u zot uchun o‘z  qizlarini nikohlashga so‘zsiz tayyor bo‘lgan minglab sahobiylar bo‘lgan. 

Qolaversa, yahudiy dinida ayollarga uylanishga mutlaq chegara qo‘yilmagani ma’lum. Payg‘ambarlar alayhimussalomning barchasi Alloh ruxsati bilan ko‘p ayollarga uylanishgan. Bu – sobit haqiqat.

Ya’qub alayhissalom ayollari to‘rtta bo‘lgan:

1. Liyya. 

2. Rohil.

3. Balho.

4. Zalfo.

Muso alayhissalom ayollari ham to‘rtta bo‘lgan:

1. Safura.

2. Bint Qoyniy.

3. Jabshiyya.

4. Bint Habbob.

Dovud alayhissalom ayollari yettita bo‘lgan:

1. Ma’ka.

2. Majiys.

3. Abiytol.

4. Abiyjol.

5. Ujla.

6. Miykol bint Shovul.

7. Axina’um.

Sulaymon alayhissalom ayollari soni yuzta bo‘lgan: 

Abu Hurayra roziyallohu anhudan rivoyat qilinadi: «Rasululloh sollallohu alayhi vasallam aytdilar: «Sulaymon ibn Dovud alayhissalom: “Bu kecha yuzta xotin(larim)ni aylanib chiqaman. Har bir xotin Allohning yo‘lida jihod qiladigan bittadan o‘g‘il tug‘adi”, – dedi. 

Shunda farishta unga:

– Inshaalloh, degin, – dedi. 

U esa (inshaallohni) esidan chiqarib, aytmadi. 

Bas,  u (ayol)larni aylanib chiqdi. Ularning  birortasi ham tug‘madi. Faqat birgina ayol, u ham bo‘lsa, (chala) yarim inson tug‘di. 

Nabiy sollallohu alayhi vasallam:

– Agar u inshaalloh, deganida edi, qasamida rost va hojatiga erishishiga umidliroq bo‘lgan bo‘lar edi, – dedilar» (Buxoriy va Muslim rivoyati). 

Ibrohim alayhissalomning ayollari to‘rtta bo‘lgan:

1. Sora.

2. Hojar.

3. Qunturo.

4. Hajun.

Ismoil alayhissalomning ayollari ikkita bo‘lgan:

1. Umora.

2. Sayyida.

Ushbu payg‘ambar alayhimussalomlar ayollari haqida internetda ko‘plab maqolalar bor, qiziquvchilar bo‘lsa qidirib topishlari mumkin. Shuningdek, ularning ismlar turli manbalarda turlicha berilganini ham e’tibordan qochirmaslik lozim. Alloh taolo O‘z mulkida g‘olib zotdir. Insonlar maslahatiga muhtoj emasdir. O‘z mulkida xohlaganicha tasarruf etguvchi va barcha fe’li hikmat va manfaatga ega Zotdir.

Alloh taolo insonlarni yaratgan, ular ichidan payg‘ambarlarni tanlab olgan va bu uchun hech kimdan maslahat so‘ramaydigan Zotdir. Binobarin, ba’zi johillarning "nega unday bo‘lgan?", "nega bunday bo‘lmagan?" deya gumon qilishlari nomaqbuldir.

Alloh taoloning fe’li va taqdiridan so‘ralmas, zotan U  Xoliqdir.  Ammo bandalar qilgan ishlaridan so‘ralarki, ular ojiz va mukallaf, ya’ni ishlariga javobgardirlar. Alloh taolo payg‘ambarlarni odamlar orasidan O‘z xohishiga ko‘ra tanlab olgan va gunohlardan saqlagan.

Bu payg‘ambarlarga turli shariatlar ato etgan. Sulaymon alayhissalomning yuzta ayoli bo‘lgan. Ya’qub alayhissalom opa-singilga uylanganlar. Bu holatlar bizga ajib tuyulsa-da, aslida o‘sha zamon uchun oddiy hol va man etilmagan edi.

Payg‘ambarimiz Muhammad sollallohu alayhi vasallamning bir necha ayolga uylanganlari shahvat yuzasidan emas, Alloh taolo ruxsati va ummat uchun manfaat uchun bo‘lgan, xolos. Zotan, u zot alayhissalom kimlarningdir doxiylari, ergashganlari kabi o‘nlab, yuzlab ayollar bilan zino qilib yashamaganlar, balki nikoh bilan hayot kechirganlar.

Shunday, ekan xayolimizga kelgan va eshitgan narsalarni aniq ilmini bilmay turib ayblash va haqorat qilishdan tiyilaveraylik. Ayniqsa, dinga oid masalalarda ehtiyot bo‘lish, aniq bilimi bo‘lmay turib biron diniy mavzuga o‘z xohishiga ko‘ra fikr bildirish va hukm berish o‘ta xatarlidir...

Sunnatulloh Abdulbosit

Manba: azon.uz