188 mingdan ortiq ziyoratchilar nega Makkaga kiritilmadi ?

Saudiya Arabistoni hukumati Haj mavsumida ziyoratchilarning xavfsizligini ta’minlash, ziyoratchilarga qulayliklar yaratish, ziyorat paytida haddan ortiq tirbandlik holatini oldini olish maqsadida mamlakatda yashovchi va xorijdan ruxsatnomasiz Makka shahriga kirmoqchi bo‘lgan shaxs va mashinalarni nazorat qiladi.

Bugun, 9 avgust kuni Haj xavfsizlik kuchlari qo‘mondonligining xabar berishiga qaraganda 188 464 nafar ziyoratchilar Makka shahriga kiritilmagan. Buning asosiy sababi sifatida ularda Haj ruxsatnomasining yo‘qligi ekani qayd etilgan.

Saudi Press Agency (SPA)ning ma’lum qilishicha, Makka shahriga kirish va chiqish qattiq nazoratga olingan. Shaharga 12 ta nazorat punkti orqali kirish yo‘lga qo‘yilgan.

Makka shahriga faqatgina Haj ruxsatnomasiga ega ziyoratchilar va Haj mavsumiga ishlashga ruxsat berilgan shaxslargina kiritiladi.

Ushbu qoidalarni buzgan shaxslar 2,6 ming AQSh dollari miqdoridagi jarimaga tortilishi ma’lum qilingan.

Ma’lumot uchun, 2017 yilda Haj qilish uchun 2,35 million ziyoratchi Makka shahriga kelgan bo‘lib, shundan 1,75 million nafarini xorijliklar tashkil etgan.

Manba: muslim.uz