Ўзбекистонда йилига 350 мингта автомобил ишлаб чиқарилиши мумкин, уларнинг ичида арзонлариям бор
Ўзбекистон Республикасида автомобил саноатини жадал ривожлантириш бўйича қўшимча чора-тадбирлари тўғрисида Президент қарори қабул қилинди. Қарор билан 2019–2023-йилларда автомобил саноатини ривожлантиришнинг асосий кўрсаткичлари белгилаб берилди. Унга кўра:
– енгил машина ишлаб чиқариш ҳажми йилига 350 мингтага етказилади;
– енгил автомобиллар ўртача 60 фоизгача маҳаллийлаштирилади;
– юк машиналари ва автобуслар ишлаб чиқариш ҳажми йилига 10 мингтагача оширилади;
– йилига 100 мингта автомобиль экспорт қилинади;
– қатор автомобил моделлари янгиланади;
– аҳолининг барча қатламлари қурби етадиган арзон автомобиллар ишлаб чиқарилади.
Аввалроқ Ахборот ва оммавий коммуникациялар агентлигида бўлиб ўтган “Ўзбекистонда автомобилсозликни ривожлантириш стратегияси” мавзусидаги тадбирда “Ўзавтосаноат” стратегик режалаштириш дирекцияси бошлиғи Рустам Қодиров 2030 йилга қадар мўлжалланган Ўзбекистон автосаноатини ривожлантириш Концепцияси ишлаб чиқилганини маълум қилганди.
Унинг айтишича, концепцияда 2 та тенденция ҳисобга олинган: биринчи 5 йилликда нархи 10 минг АҚШ доллари атрофида бўлган арзон автомобиллар ишлаб чиқарилишига эътибор қаратилади, кейинги 5 йилликда эса нархи 15 000 АҚШ доллари атрофида бўлган кроссовернинг кичикроқ моделларини ишлаб чиқарилади.
“Ўзавтосаноат” мутасаддиси премиум сегмент Ўзбекистонда катта талабга эга эмаслигини, ҳатто автоконцерн умумий ҳажмининг 10 фоизини ҳам ташкил этмаслигини таъкидлаган.
Рустам Қодиров, шунингдек, тез орада Ўзбекистонда эски автомобилни топшириб, янгисини олиб кетиш мумкин бўлишини ҳам айтган. Фақат бу қачон бўлишига аниқлик киритмаган.
Manba: minbar. uz
