Ўзбекистонда аҳолининг ўсиши секинлашди
![Ўзбекистонда аҳолининг ўсиши секинлашди Ўзбекистонда аҳолининг ўсиши секинлашди](/photos/news/gpbKefsGsiNoKbj.jpeg)
2024 йилнинг 1 июл ҳолатига Ўзбекистон аҳолиси 37 млн 134,2 минг кишини ташкил этиб, ўтган йилнинг мос даврига нисбатан 2,1 фоиз ёки 761,8 минг кишига кўпайган. Бу ҳақда Статистика агентиги маълум қилди.
Жорий йилдан бошлаб аҳоли сонининг ўсиши секинлаша бошлаган. Хусусан, 2023 йилнинг мос даврида аҳолининг ўсиш 2,2 фоиз ёки 768,8 минг нафар ташкил этган.
2024 йил январ-июн ойларида Ўзбекистонда қайд этилган никоҳлар сони 97 минг 400 тани ташкил этиб, ўтган йилнинг мос даврига нисбатан 1265 тага камайган. 2022 йилнинг мос даври билан таққосланганда эса 11 минг 534 тага камайган.
Ҳисобот даврида қайд этилган никоҳларда аёлларнинг ўртача ёши 22,9 ёшни, эркакларнинг ўртача ёши эса 27,8 ёшни ташкил этган. Қайд этилган никоҳларнинг энг катта улуши 25 ёшгача бўлган аёлларга тўғри келиб, жами никоҳларнинг 76,2 фоизини ташкил этган.
Жорий йилнинг биринчи ярим йиллигида қайд этилган никоҳдан ажралишлар сони 22 минг 467 тани ташкил этиб, 2023 йилнинг мос даврига нисбатан 2955 тага ёки 11,6 фоизга камайган. Шундай бўлса-да, бу кўрсаткич 2021 йилга нисбатан 3 мингтага кўп.
2024 йил январ-июнь ойларида фарзандсиз никоҳдан ажралишлар сони 10 минг 479 тани (46,6 фоиз), 1 нафар фарзанд билан ажранлишлар сони 6616 тани (29,4 фоиз), 2 ва ундан ортиқ фарзанд билан никоҳдан ажралишлар сони 5374 тани (24 фоиз) ташкил этган.
Никоҳдан ажрашганларнинг ўртача ёши эркаклар учун 37,1 ёшни, аёллар учун 32,2 ёшни ташкил этган. Никоҳдан ажрашганларнинг энг катта улуши 35 ёшгача бўлган аёлларга тўғри келиб, жами никоҳдан ажрашганларнинг 64,1 фоизини ташкил этган.