Туркияда харобалар остида қолган фуқаролар қутқарилмоқда — Фаҳреттин Алтун
Туркия Республикаси Президентлиги ҳузуридаги Коммуникациялар бўйича раҳбари Фаҳреттин Алтун мамлакатда табиий офат оқибатларини бартараф этиш бўйича катта ҳажмдаги ишлар амалга оширилаётганини таъкидлади.
"Кеча Туркиянинг жануби-шарқидаги ўнта шаҳарда содир бўлган икки кучли зилзилага жавобан биз тезкор чора-тадбирларни кўрган ҳолда жадал қидирув-қутқарув операциясини бошладик. Бизнинг саъй-ҳаракатларимиз тўлиқ қувват билан ишлашда давом этмоқда.
53 минг нафар ходим, 1000 дан ортиқ тез тиббий ёрдам машинаси, 5 минг нафар тиббиёт ходими, 54 ҳарбий юк самолёти ва 10 та ҳарбий кемадан иборат қидирув-қутқарув гуруҳларимиз бу оғир дардни енгил қилиш учун ҳаракат қилмоқда. Дўст давлатлардан келаётган ёрдам ва кўмак ҳам ортиб бормоқда.
Ҳозиргача 70 та давлат ва 14 халқаро ташкилот ёрдам беришга ваъда берган. Биз халқаро ҳамжамиятнинг қўллаб-қувватлагани учун миннатдормиз.
Афсуски, ҳозиргача зилзила оқибатида кўплаб фуқаролар ҳалок бўлди. Бизга тасалли берадиган ягона нарса шуки, қидирув-қутқарув ишлари кучайгани сари вайроналар остида қолиб кетган яна кўп фуқаролар қутқарилмоқда. Ҳозиргача биз 8000 дан ортиқ фуқарони қутқардик.
22 мингдан ортиқ жароҳатланган фуқаролар шифохоналаримизда даволанмоқда. Зилзиладан жабр кўрган вилоятларга 54 минг чодир ва 100 мингдан ортиқ ётоқ жўнатилди. Бундан ташқари, биз туризм инфратузилмасини зилзила қурбонларига бағишладик, фуқароларимизни 50 мингдан ортиқ ўринлар билан таъминладик.
Шунингдек, биз транспорт, алоқа ва энергетика инфратузилмасини таъмирлаш бўйича тезкор иш олиб бормоқдамиз. Зилзиладан жабр кўрган фуқароларга кўмак кўрсатилаётгани юрт миқёсида катта шижоат билан олиб борилаётган ёрдам кампаниялари натижасида кундан-кунга кучайиб бормоқда.
Биз Туркия сифатида жаҳон тарихида камдан-кам учрайдиган фалокатни жаҳон тарихида кам учрайдиган бирдамлик ва бирлик руҳи билан енгиб ўтишга ҳаракат қилмоқдамиз. Биз халқаро ҳамжамиятга самимий қўллаб-қувватлаш ва ҳамдардлик учун яна бир бор миннатдорчилик билдирамиз", деди Алтун.
