Тошкентда аёлларни Олмаотага фоҳишалик билан шуғулланиш учун сотмоқчи бўлганга ҳукм ўқилди

“Ўрганган кўнгил ўртанса қўймас”, деган нақл қанчалик ҳақиқат эканига қуйидаги воқеа сабаб, яна бир карра амон бўлсангиз ажабмас. Бироқ шуни ҳам унутмаслик керакки, саёқ юрсанг, таёқ ейсан. “Қаҳрамон”имизнинг ўзи қиз фарзандни тарбия қила туриб, қўлнинг кири бўлган пул учун оналик ва аёллик номига доғ туширгани кишини ўйга толдиради...

Тошкент шаҳар ИИББ ТЭҚКБ ва Яшнобод тумани ИИО ФМБ ТЭҚКБ тезкор ходимлари томонидан икки нафар аёлнинг аризасига асосан тезкор тадбир ўтказилди. 33 ёшли аёл алдов йўли билан икки нафар танишининг ишончига киради. Қозоғистон Республикаси Олмаота шаҳридаги танишларини олдига юбориб, дастлаб уларга 250.000 тенге миқдорида мажбурий ишлаб бериш, сўнг ҳар бир “мижоз”ни қабул қилгани учун 10.000 тенгени танишига топшириш ва топширилган пул миқдорини тенг иккига бўлиш ваъдасида фоҳишалик билан шуғулланишларига кўндиради. Икки аёлни Тошкент вилоятининг Тошкент туманида жойлашган “Ғишткўприк” чегара маскани орқали юбораётган вақтида ушланган. Бу ҳақда Тошкент шаҳар судининг Жамоатчилик ва ОАВ билан ҳамкорлик бўйича бош консультанти Садоқат Аллаберганова хабар қилди.

“ҚИЛМИШИМДАН ЧИН КЎНГИЛДАН ПУШАЙМОНМАН”

Судланувчи суд мажлисида айбига тўлиқ иқрорлик билдирди...

— Тахминан 7 ойдан буён фоҳишалик билан шуғулланаман. Шу мақсадда 2 маротаба Қозоғистоннинг Олмаота шаҳрига бориб келганман. У ерда менга бир аёл қўшмачилик қилган. Фоҳишалик қилиб юрган вақтимда бошқа фоҳиша қизлар ўзлари билан танишларини олиб келиб, у аёлга топширганида, уларга қанчадир миқдорда пул берганини кўрганман. Кейин Ўзбекистонга қайтганимда бир аёл билан танишиб қолдим. У ҳам фоҳишалик билан шуғулланган. Унга Қозоғистонга бориб фоҳишалик қилишни таклиф қилганман. Пулга муҳтож бўлгани сабабли, танишларимни қўшмачи аёлга фоҳишаликка олиб боришни, ўзим ҳам фоҳишалик қилишимни ва полицияга тўланиши лозим бўлган пулдан озод бўлиб, қизларни олиб борганимдан даромад олишимни ўйладим. Танишимнинг уйига бориб, унга Қозоғистонга кетаётганимни, унга ҳам боришни таклиф қилиб, у ерда фоҳишаликдан ойига 1000 АҚШ долларигача топиши мумкинлигини айтиб қизиқтирдим. Шунингдек, унга дастлаб 250.000 тенге бадал пулини ишлаб бериши кераклиги, сўнг ҳар бир мижоздан 5000 тенге, 1 соатлик “хизмат”дан 10.000 тенге олиши ҳамда ушбу ишланган пулни ярмини ўзига олишини, кунига 50.000 тенге ишлаши кераклигини тушунтирдим. Шу вақтда танишимнинг дугонаси келиб қолди. У дугонасига ҳам Қозоғистонда фоҳишалик қилишни таклиф қилди. Бунгача 15 нафар қизни Қозоғистонга жўнатиб юборганимни айтдим. Аслида бу гапларни уларни қизиқтириш учун айтгандим. Шундан сўнг иккови рози бўлишди. Вақтни белгилаб, Қозоғистонга кетишни режалаштирдик. Эртаси куни танишимнинг уйида йиғилдик ва Тошкент туманидаги чегара постга бордик. Икковига чегарачи ходимларда шубҳа уйғотмаслик учун алоҳида-алоҳида бўлиб ўтишларини, ўзим эса уларнинг ортидан ўтишимни айтдим. Сўнг мен ички ишлар органи ходимлари томонидан ушландим. Қилмишимдан чин кўнгилдан пушаймонман, қилмишининг оқибатини англаб етгандим. Бошқа бу ҳолатни такрорламасликка ваъда бераман. Қарамоғимда 11 ёшли қизим борлигини инобатга олиб енгил жазо тайинлашни сўрайман.

“ТОШКЕНТ ШАҲАР ИИББГА АРИЗА БЕРДИК”

Жабрланувчилардан бири эса судда қуйидагиларни баён қилди...

— У аёл билан 2019 йилнинг ёз ойларидан буён танишмиз, бир неча маротаба Қозоғистонга бориб, фоҳишалик билан шуғулланган. Мени ҳам бир неча маротаба шу йўлдан юришга кўндиришга ҳаракат қилган, лекин Қозоғистонга бориб “ишлаш”дан қўрққанман. У уйимга келиб, яна Қозоғистонга кетаётганини айтиб, бирга боришни таклиф қилди. Қизиқиб, қанча пул топишим мумкинлигини сўрадим. Бир “мижоз”дан 5000 тенге олиниши, кунига 50.000 тенге “план” беришим кераклигини айтди. Корейс миллатига мансуб бўлганим сабабли Қозоғистонда менга талаб кўп бўлишини айтиб қизиқтирди. Шу пайт дугонам ҳам уйимга келди. У икковимизни кўндиришга ҳаракат қилди. Дастлаб Қозоғистонга борилганда маҳаллий полицияни кўндириш учун 250.000 тенгедан пул бериш кераклиги, сўнг ишлаб топган пулларни тенг иккига, яъни ярми қўшмачи аёлга, қолган ярми ўзимизга қолишини айтди. Таклифга рози бўлиб, эртаси куни яна уйимда йиғилишдик. У билан бўлган сўзлашувларни телефонимга ёзиб олдим. Шу куни кеч соатда дугонам менга қўнғироқ қилиб, “танишингнинг ҳаракатларидан шубҳаланаёяпман. Одам савдоси қурбони бўлишимиз мумкин”, деб қолди. Кейин иккаламиз келишиб, танишимнинг хатти-ҳаракатлари юзасидан чора кўриш ҳақида Тошкент шаҳар ИИББга ариза бердик...

Бахриддин ИКРАМОВ, жиноят ишлари бўйича Яшнобод туман суди судьяси:

— Судланувчи ЖКнинг 135-моддаси 2-қисми “б” банди билан ЖКнинг 57-моддасини қўллаб, ойлик иш ҳақининг йигирма фоизини давлат даромади ҳисобига ушлаб қолган ҳолда 3 йил ахлоқ тузатиш ишлари жазоси тайинланди.