ССВ: Она ва бола саломатлиги муассасалари фаолияти танқидий кўриб чиқилди
Жорий йил 5 февраль куни Президент раислигида ўтган ижтимоий соҳадаги устувор вазифаларга бағишланган йиғилишда тиббиётдаги бир қатор муҳим масалалар қаторида оналик ва болаликни муҳофаза қилиш борасида ҳам сўз юритилиб, эндиликда ҳар бир она ва бола ўлими “фавқулодда ҳолат” деб баҳоланиши ва шунга мувофиқ чора кўрилиши таъкидланган эди.
Ушбу топшириқлар ижроси, соҳадаги вазиятни тартибга солиш ва келгусидаги режаларни тизим масъулларига қатъий белгилаб бериш мақсадида куни кеча Соғлиқни сақлаш вазири вазифасини бажарувчи А. Худаяров томонидан Республика ихтисослаштирилган она ва бола саломатлиги илмий-амалий тиббиёт марказида соҳа мутахассислари билан видеомулоқот ўтказилди.
Маълумки, 2023 йилнинг 8 сентябрида қабул қилинган Президентнинг тегишли қарорига асосан, оналар ва болалар саломатлигини муҳофаза қилиш мақсадида соҳага ихтисослашган тиббиёт муассасалари ягона тизимга бирлаштирилди.
Натижада аҳолисининг 17 миллион нафардан ортиғини хотин-қизлар ташкил этадиган мамлакатимизда 9,2 миллион нафардан зиёд туғиш ёшидаги аёлларга сифатли ва тизимли тиббий хизмат кўрсатиш, туғилажак болалар саломатлигини назорат қилишнинг яхлит механизми яратилди.
Ўтказилган мулоқотда 22 мингдан зиёд ўринга эга бўлган 229 та туғуруқ, 11 миллион нафар болага хизмат қилаётган 13 мингдан ортиқ ўринга эга 245 та педиатрия муассасаси фаолияти жиддий таҳлил қилинди.
Қайд этилишича, соҳада зарур шароитлар яратилганига қарамай, ҳозирга қадар туғиш ёшидаги аёлларнинг тиббий кўриги ўз ҳолига ташлаб қўйилган. Ҳомиладорликка мутлақ монелиги бўлган аёллар рўйхатлари тўлиқ жамланмаган. Улар билан ҳудудда индивидуал ишлаш талаб даражасида эмас.
Натижада қандли диабет, жигар циррози, хавфли ўсма ва артериал гипертония каби касалликлари бўлган аёллар ҳомиладор бўлмоқда ва ҳаёти хавф остида қоляпти.
Ҳар бир тиббий бригада таркибида алоҳида доя ҳамшираси штати ажратилгани ҳамда вазифалари аниқ белгилаб берилганига қарамай, бирламчи тизимда уларнинг тиббий назорати етарли даражада олиб борилмаяпти. Шу боис тиббий бригада доялари бу борада тегишли патронаж тадбирларини ўз вақтида амалга ошириши керак экани алоҳида таъкидланди.
Йиғилишда 2023 йил 8 сентябрдаги Президент қарори ва давлат раҳбарининг 2024 йил 5 февралдаги топшириқларидан келиб чиқиб, соҳа вакиллари зиммасига қатор вазифалар юкланди.
Унга кўра, эндиликда ҳомиладорликка мутлақ ёки нисбий монелиги бўлган ва ҳомиладорлиги асорат билан кечаётганлар бирламчи тизимдаги “Аёллар маслаҳатхонаси”да туғуруқ комплекслари шифокорлари томонидан чуқурлаштирилган тиббий кўрикдан ўтказилиб, кундалик режа асосида соғломлаштириш чораси кўрилади.
Патронаж дояси ўз участкасидаги ҳар бир ҳомиладор аёлнинг амбулатор ва стационар шароитдаги текширув ва даволаш жараёнларини назоратга олиб, шахсан кузатиб боради.
Туғуруқ комплексларининг барча акушер-гинеколог, неонатолог, анестезиолог-реаниматологларининг режа асосида кундалик, ҳафталик ва ойлик малака оширишлари тизимли йўлга қўйилади.
Жорий йил 1 мартга қадар туғиш ёшидаги аёлларнинг тиббий кўрик тартиби ва ҳисобот шакллари жаҳон андазаси ва замонавий талаблар асосида қайта кўриб чиқилади.
Кўп тармоқли марказий ва оилавий поликлиника акушер-гинекологлари ва дояларнинг функционал вазифалари қайта белгиланади.
Ҳудудларга бириктирилган етакчи акушер-гинекологларнинг амалга оширадиган асосий вазифалари ишлаб чиқилади.
Юқоридаги вазифалардан келиб чиқиб, вазирлик ҳузурида яқинда ташкил этилган Репродуктив саломатлик бўйича штаб фаолиятини янада жонлантириш вазифаси қўйилди.
Мулоқот якунида оналар ва болалар саломатлиги соҳасида эришиладиган натижалар миллатнинг нафақат бугуни, балки келажаги учун ҳам муҳим экани таъкидланди. Бунинг учун соҳадаги ҳар бир ходим, ҳар бир раҳбар ўз ишига виждонан ёндашиб, ҳомиладор аёл ва туғилажак бола саломатлиги учун шахсий жавобгарликни асло унутмаслиги лозимлиги айтиб ўтилди.
