Сирдарёда ҳокимнинг қарорларини соҳталаштириб, фирибгарлик содир қилган шахсга суд ҳукми ўқилди

Охирги пайтларда фирибгарлик орқали мўмай даромад олишга қаратилган жиноятларга кўзимиз тез-тез тушиб қолади.

Бу дунёда изоҳ талаб қилмайдиган шундай бир ҳақиқат бор: жиноий йўл билан топилган бойлик ҳеч кимга, ҳеч қачон буюрмайди, ноҳалол луқмадан бирон кимса ўсиб-унмаган, барака топмаган. Қуйидаги жиноят тафсилоти ҳам шу ҳақда.

Ш.Одинаев ҳеч қаерда ишламасдан, унда ер майдони ажратиш ва эгалик қилиш ҳуқуқига оид ҳужжатларни тасдиқлаш ваколати бўлмаса-да, 2020 йил 6 июль куни ўзининг ўртоғи Д.Мустафақуловга Гулистон шаҳар ҳокимлигида ишловчи танишлари орқали, Гулистон шаҳар ҳудудидан уй-жой қуриш учун 0,04 гектар ер ажратиб беришни ваъда қилиб, уни ишонтириб, алдаб, пора беришга далолат қилиб, жами 11.000.000 сўмини қўлга киритиб, Д.Мустафақуловни ишонтириш учун Гулистон шаҳар ҳокимлигининг 2020 йил 06 июль кунги 1473-сонли “Гулистон шаҳар ҳудудидан турар-жой қуриш учун ер майдони ажратиш тўғрисида”ги қалбаки қарорни тайёрлаб берган.

Бундан ташқари, Ш.Одинаев 2020 йил август ойида М. Саиповага Гулистон шаҳар ҳокимлигида ишловчи танишлари орқали Гулистон шаҳар ҳудудидан уй-жой қуриш учун 0,06 гектар ер ажратиб беришни ваъда қилиб, уни ишонтириб, алдаб, пора беришга далолат қилиб, жами 2.600.000 сўмни фирибгарлик йўли билан қўлга киритиб, М.Саиповани ишонтириш учун унга Гулистон шаҳар ҳокимлигининг 2020 йил 14 август кунги 1664-сонли “Гулистон шаҳар, Қаропчи маҳалласи ҳудудидан турар-жой қуриш учун ер майдони ажратиш тўғрисида”ги қалбаки қарорни тайёрлаб берган.

Шунингдек, Ш.Одинаев 2020 йил ноябрь ойида М.Саиповага синглиси Саипова Мафтунани номига Гулистон шаҳар ҳокимлигида ишловчи танишлари орқали Гулистон шаҳар ҳудудидан уй-жой қуриш учун 0,06 гектар ер ажратиб беришни ваъда қилиб, ишонтириб, алдаб, пора беришга далолат қилиб, жами 2.450.000 сўмни қўлга киритиб, М.Саиповани ишонтириш учун унга Гулистон шаҳар ҳокимлигининг 2020 йил 11 ноябрь кунги 2145-сонли “Гулистон шаҳар, Қаропчи маҳалласи ҳудудидан турар-жой қуриш учун ер майдони ажратиш тўғрисида”ги қалбаки қарорни тайёрлаб берган.

Бундан ташқари, Ш.Одинаев 2021 йил 26 февраль куни ўртоғи Д.Мустафақуловга турмуш ўртоғи Г.Тагаймуратованинг номига Гулистон шаҳар ҳокимлигида ишловчи танишлари орқали Гулистон шаҳар, Қаропчи маҳалласи ҳудудидан уй-жой қуриш учун 0,04 гектар ер ажратиб беришни ваъда қилиб, ишонтириб, алдаб, пора беришга далолат қилиб, жами 11.000.000 сўмни қўлга киритиб, Д.Мустафақуловни ишонтириш учун унга Гулистон шаҳар ҳокимлигининг 2020 йил 06 июль кунги 1473-сонли “Тагаймуратова Гулчеҳра Туйчиевнага Гулистон шаҳар, Қаропчи маҳалласи ҳудудидан турар-жой қуриш учун ер майдони ажратиш тўғрисида”ги қалбаки қарорни тайёрлаб берган вақтда, ушбу қарорни Д.Мустафақулов текширтириб сохта эканлигини маълум қилганида, “ҳокимиятда ишловчилар шошма-шошарлик билан қарорни тайёрлаганлигини”, ҳақиқийсини олиб келиб беришини айтиб, 2021 йил 26 февраль кунги 21/58-сонли “Гулистон шаҳар, Қаропчи маҳалласи ҳудудидан турар-жой қуриш учун ер майдони ажратиш тўғрисида”ги қалбаки қарорни тайёрлаб берган.

Суд, мазкур жиноят ишини мазмунан кўриб чиқиб, Ш.Одинаевга Ўзбекистон Республикаси ЖКнинг 168-моддаси 3-қисми “б” банди, 228-моддаси 2-қисми “а” банди ва 28,211-моддаси 2-қисми “а” банди билан ЖКнинг 57, 59,61-моддаларига асосан 3 йил муддатга озодликдан маҳрум қилиш жазосини тайинлади.

Мазкур жиноят иши Ш.Одинаевнинг адвокати томонидан берилган шикоятига асосан апелляция инстанцияси судида кўриб чиқилди.

Бироқ, апелляция инстанцияси суди, биринчи босқич суди томонидан Ш.Одинаевга жазо тайинлашда қилмишнинг сабабини, унинг шахсини, жиноятни ғараз ниятда содир қилганлигини, етказилган зарарнинг миқдорини, жиноятларнинг хусусияти ва ижтимоий хавфлилик даражасини инобатга олиб, озодликдан маҳрум қилиш жазосини тайинлаб, қонуний ва асосли хулосага келганлигини эътироф этди.

Қилмишларидан тўғри хулоса чиқармаган Ш.Одинаевнинг тақдири айримлар учун сабоқ вазифасини ўташи шубҳасиз. Чунки ҳалол яшаш ўрнига жиноятчиликни касб қилган кимсаларнинг аҳволи ҳамиша ачинарлидир ва уларга жазо муқарардир.

Бахтиёр Мамадаминов,
Сирдарё вилоят судининг жиноят ишлари бўйича судьяси