Трамп Эронни жиддий огоҳлантирди: "Бу ишни қила кўрманг..."

Исроил ва Эрон якшанбага ўтар кечаси бир-бирига янги ҳужумлар уюштирди, шу билан бирга АҚШ Президенти Дональд Трамп бу можарони осонлик билан тугатиш мумкинлигини айтди ҳамда Эронни АҚШ нишонларига ҳужум қилмаслик ҳақида огоҳлантирди. Бу ҳақда Reuters нашри ёзмоқда.

Исроилнинг қутқарув гуруҳлари зарбалар оқибатида вайрон бўлган турар жой бинолари остида тирик қолганларни қидирмоқда. Чироқ ва ҳид билувчи итлар ёрдамида изланиш олиб борилмоқда. Расмийларга кўра, камида етти киши, жумладан болалар ҳалок бўлган.

Теҳрон ядровий музокараларни тўхтатди, ҳолбуки, Вашингтон бу музокараларни Исроил бомбардимонларини тўхтатишнинг ягона йўли деб билган эди. Исроил Бош вазири Биньямин Нетаньяҳунинг айтишича, ҳозирча Исроил томонидан амалга оширилган ҳужумлар Эрон олдинда кўрадиган нисбатан кучлироқ жавобларга нисбатан жуда заиф кўринади.

Трамп Truth Social’даги мурожаатида шундай деди:

"Агар бизга Эрон томонидан қандай шаклда бўлмасин ҳужум қилинса, АҚШ қуролли кучларининг тўлиқ қудрати сизларга ҳеч қачон кўрилмаган даражада ташланади. Шу билан бирга, биз Эрон ва Исроил ўртасида осонгина келишувга эриша оламиз ва бу қонли можарони тугатишимиз мумкин."

Бироқ Трамп бу эҳтимолий келишув тафсилотларини ошкор этмади.

Эрон маълумотларига кўра, жума куни Исроилнинг биринчи ҳужуми оқибатида 78 киши ҳалок бўлган, шанба куни эса бундан ҳам кўпроқ қурбонлар бўлган. Теҳронда жойлашган 14 қаватли турар жой биносига ракета тушиши оқибатида 60 киши, шундан 29 нафари болалар, вафот этган.

Шаҳрон нефть омборига ҳам Исроил томонидан зарба берилганини Эрон тасдиқлади, бироқ вазият назорат остида экани маълум қилинди. Пойтахт яқинидаги нефтини қайта ишлаш заводида ҳужумдан сўнг ёнғин чиққан. Исроил зарбалари шунингдек Эрон Мудофаа вазирлиги биносига ҳам қаратилган бўлиб, у ерда кичик даражадаги зарар етказилган, деб хабар берди "Тасним" ахборот агентлиги.

Исроилда эса сўнгги Эрон ҳужумлари шанба куни кечаси соат 23:00 атрофида (GMT 20:00) бошланди. Қуддус ва Ҳайфа шаҳарларида ҳаво ҳужуми сигнализацияси жиринглаши билан тахминан бир миллион киши бошпаналарга кириб кетди. Соат 2:30 атрофида Исроил ҳарбийлари навбатдаги ракета ҳужуми хавфи ҳақида огоҳлантирди ва фуқароларни хавфсиз жойга ўтишга чақирди. Тел-Авив ва Қуддус осмонида портлашлар янгради, ҳавога қарши мудофаа тизими ишга туширилди. Тахминан бир соатдан сўнг фуқароларга берилган бошпанадан чиқмаслик ҳақидаги огоҳлантириш бекор қилинди.

Якшанба куни Ямандаги Эронга алоқадор ҳусийлар гуруҳи илк бор можарога қўшилганини эълон қилди. Уларга кўра, сўнгги 24 соат ичида Исроилнинг марказий қисми — Яффага бир неча баллистик ракеталар йўлланган.

Исроил тез ёрдам хизмати маълум қилишича, кечаги ҳужумларда камида 7 киши ҳалок бўлган — улар орасида 10 ёшли ўғил бола, ёш қиз ва 20 ёшлардаг бир аёл ҳам бор. Шунингдек, 140 дан ортиқ одам турли даражада тан жароҳати олган.

Исроил ОАВлари маълумотига кўра, Тел-Авив жанубидаги Бат Ям шаҳрида ракета зарбаси 8 қаватли бинога тегган. Авария хизматлари вакилининг айтишича, кўплаб одамлар вайроналар остида қутқарилган бўлса-да, қурбонлар ҳам бор. Камида 35 киши бедарак йўқолган деб ҳисобланмоқда.

Тун давомида нечта бино зарба остида қолганини аниқлаш ҳали мумкин эмас.

Шу пайтгача, жума кунидан бери Эроннинг қасос зарбалари натижасида Исроилда камида 10 киши ҳалок бўлган, 300 дан ортиқ одам тан жароҳати олган.